1 июлдан Қозоғистонда янги Конституция кучга кирди

1 июль куни Қозоғистонда 2026 йил 15 март куни бўлиб ўтган умумхалқ референдумида қабул қилинган мамлакатнинг янги Конституцияси кучга кирди. Қозоғистон тарихида биринчи марта мамлакатнинг асосий қонуни умумхалқ референдуми орқали қабул қилинди, фуқароларнинг 87,15 фоизи Конституцияни ёқлаб овоз берган эди.  
 
 
Янги Конституциянинг ўзига хос хусусияти фуқароларнинг ҳуқуқ ва манфаатларини биринчи ўринга қўйиши, адолат ва ишонч тамойилларини мустаҳкамлашидир. Конституция мамлакат ҳуқуқий тизимининг асоси бўлиб хизмат қилади, давлат тузилиши тамойилларини белгилайди, фуқароларнинг ҳуқуқ ва эркинликларини кафолатлайди ҳамда мамлакатнинг узоқ муддатли стратегик ривожланиш устуворликларини белгилайди.  
 
Янги Конституция муқаддима, 11 бўлим ва 104 моддадан иборат. Янги Конституцияга мувофиқ, 2026 йил 1 июлдан бошлаб Сенат тугатилади ва унинг ўрнига бир палатали «Қурултой» ташкил этилди. Шу билан бирга, витсе-президент лавозими ҳам таъсис этилди. Президентнинг кўрсатмаларига биноан, витсе-президент давлат идоралари билан ўзаро муносабатларда президент томонидан белгиланган функцияларни бажаради.