«Лотин ёзувига асосланган ўзбек алифбосини жорий этиш тўғрисида»ги қонунга ўзгартириш киритиш ҳақидаги қонун матни эълон қилинди
Қонун расмий эълон қилинган кундан эътиборан олти ой ўтгач кучга киради.
Ўзбекистонда лотин ёзувига асосланган ўзбек алифбоси 28 та ҳарф ва 1 та тутуқ белгисидан иборат бўлади. Бу ҳақда 2026 йил 21 октябрда имзоланган «Лотин ёзувига асосланган ўзбек алифбосини жорий этиш тўғрисида»ги Ўзбекистон Республикаси Қонунига ўзгартириш киритиш ҳақидаги қонун матнида маълум қилинди.
Мазкур ҳужжатга кўра, амалдаги 26 та ҳарф ва 3 та ҳарфлар бирикмаси ўрнига янгиланган алифбо жорий этилмоқда. Хусусан, алифбо таркибига Ğğ, Öö, Şş, Çç ҳарфлари киритилди. Ушбу қонун расмий эълон қилинган кундан эътиборан олти ой ўтгач кучга киради.
Ўтиш даври ва ҳужжатларнинг амал қилиши
Қонун кучга киргунига қадар лотин ёзувига асосланган ўзбек алифбосида расмийлаштирилган ҳужжатларда, миллий валютада ва қимматли қоғозларда ҳарфларнинг аввалги шакли мавжуд бўлиши уларнинг амал қилишига ва муомалада бўлишига монелик қилмайди.
Давлат органлари ва ташкилотларининг аввалги ҳарфлар мавжуд бўлган рамзий белгилари ва бошқа атрибутларидан, бинолардаги давлат гербининг бўртма тасвиридан, пешлавҳа ва кўрсаткичлардан улар яроқсиз ҳолатга келгунига қадар ёки Вазирлар Маҳкамаси белгилайдиган муддатгача фойдаланилади.
Шунингдек, Вазирлар Маҳкамасига икки ой муддатда ушбу қонуннинг ижросини амалга оширишга доир чора-тадбирлар дастурини ишлаб чиқиш ва тасдиқлаш вазифаси юклатилди.
