18 yoshga to‘lmaganlar uchun maxsus ChatGPT versiyasi joriy etiladi — OpenAI

OpenAI rahbari Sem Altmanning ta’kidlashicha, yoshlar sun’iy intellekt bilan ishlashda alohida himoyaga muhtoj va shu bois kompaniya yoshni aniqlovchi maxsus tizimni ishlab chiqmoqda. Bu haqda u yangi bayonot bilan chiqdi. «Biz xavfsizlikni maxfiylik va erkinlikdan ustun qo‘yamiz. Bu yangi va kuchli texnologiya, va biz nobolig‘larga jiddiy himoya kerak, deb hisoblaymiz», — dedi Altman. Uning so‘zlariga ko‘ra, ChatGPT foydalanuvchi 18 yoshdan kichik ekanini aniqlasa, avtomatik ravishda ular uchun mo‘ljallangan versiyaga yo‘naltiriladi. Bu versiyada fahsh mazmunlardan himoya va zarur hollarda huquqni muhofaza qilish organlarini jalb qilish imkoni bo‘ladi. OpenAI yosh aniqlashga shubha bo‘lgan hollarda ham «kafolatli xavfsizlik» siyosatini qo‘llab, foydalanuvchini nobolig‘a deb hisoblashini ma’lum qildi. Shuningdek, ayrim holatlarda yoki ayrim davlatlarda foydalanuvchilardan yoshni tasdiqlovchi hujjat so‘ralishi mumkin. OpenAI bunday yondashuvni kattalar maxfiyligi uchun ma’lum «sozlash» deb atadi, ammo bu «asossiz erkinlik» o‘rniga bolalar xavfsizligi muhimroq, deyiladi. Yaqin vaqtda kompaniya ota‑onalar uchun ChatGPT’da alohida nazorat funksiyalarini joriy etadi. Unga ko‘ra, ota‑onalar farzandlarining akkauntini o‘z hisoblariga bog‘lay oladi, chatbot faoliyatini cheklaydi va maxsus «dam olish soatlari»ni belgilashi mumkin bo‘ladi. OpenAIʼning ma’lum qilishicha, bunday choralar so‘nggi paytlarda ChatGPT yoshlarga so‘zsiz ta’sir ko‘rsatayotgani bilan bog‘liq xavotirlar tufayli joriy etilmoqda. Xususan, yaqinda 16 yoshli Adam Reynning ota-onasi OpenAI va Sem Altmanga qarshi da’vo arizasi kiritdi. Ularda ChatGPT o‘g‘illariga o‘zini o‘ldirish usullarini tavsiya qilgani haqida iddao qilingan. Avvalroq odamlar ChatGPT'dan asosan kundalik masalalarda foydalanayotgani aniqlangani haqida xabar bergan edik.