2025 йилда автомобил транспортида 7 млрдга яқин йўловчи ташилган
Ўтган йили автомобиль транспорти умумий йўловчи ташиш ҳажмининг қарийб 96 фоизини ташкил этди.
2025 йил давомида Ўзбекистонда автомобиль транспорти орқали 6 млрд 989 млн нафар йўловчи ташилган. Бу кўрсаткич умумий йўловчи ташиш ҳажмининг 95,7 фоизини ташкил этгани билан соҳа етакчи ўринни сақлаб қолганини кўрсатади.
Миллий статистика қўмитаси маълумотларига кўра, мазкур кўрсаткич 2024 йилга нисбатан 5,2 фоизга ошган.
Солиқ қўмитаси маълумотларига кўра, солиқ тизимига уланган 224 та такси агрегатори орқали бир йилда 479 миллион марта йўловчи ташилган. Йўловчи ташиш хизматларининг умумий айланмаси 9,6 трлн сўмни ташкил этган.
Ушбу айланманинг 6,7 трлн сўми ёки 70,2 фоизи нақд тўловларга, 2,8 трлн сўми эса нақдсиз тўловларга тўғри келган. Ўртача битта сафар учун чек миқдори 20 минг сўмдан ошган. Бу кўрсаткич 2024 йилга нисбатан ўсган бўлиб, ўша йилда ўртача чек 18,5 минг сўм атрофида эди.
