«Агар тирик қолмоқчи бўлсангиз»: Лукашенко қўл остидагиларга Беларуснинг урушга тайёргарлиги ҳақида маълум қилди

Беларус президенти бугунги йиғилишда «ҳеч қандай тинчлик даври» бўлиши мумкин эмаслигини айтди ва мамлакат урушга тайёргарлик кўраётганини алоҳида таъкидлади. Бу ҳақда БелТА агентлиги хабар берди.

Нашр маълумотларига кўра, бугун, 1-апрел куни Беларус президенти Александр Лукашенко мамлакат Қуролли Кучларининг комплекс текшируви якунларини сарҳисоб қилган.

«Ҳеч қандай тинчлик даври бўлиши мумкин эмас. Биз урушга тайёргарлик кўряпмиз. Қуролли Кучларни айнан шунинг учун ташкил этганмиз, шунинг учун уларни таъминлаб турибмиз, халқ бизни боқиш учун айнан шу мақсадда маблағ ажратмоқда. Ва бу аудиторияда (фақат бу ерда эмас) одамлар шуни тушунишлари керак: биз урушга мутлақо қаршимиз. Айниқса, офицерларимиз, аскарларимиз, Қуролли Кучларимиз. Чунки биз уруш нима эканлигини биламиз.

Биз урушни хоҳламаймиз, лекин армия айнан шу мақсад учун мўлжалланган. Агар тўсатдан кимдир биз билан қурол нишони орқали гаплашишга ва бизга қарашга қарор қилса, биз жавоб қайтарамиз. Шунга тайёргарлик кўряпмиз. Афсуски, вазият шундайки, сизларсиз мен жанг қилолмайман. Ва мен қўл остидагиларнинг жанг қилишга тайёр бўлишини хоҳлайман. Агар биз урушга тайёр бўлсак, биздан қўрқишади (бу жуда муҳим) ва бу ерга ҳеч ким суқилиб кирмайди. Менинг мақсадим шу», — деди Александр Лукашенко.

Шунингдек, Беларус президенти матбуот хизматининг «Пул первого» Telegram-каналида у текширув якунларини сарҳисоб қилган видео эълон қилинди. У ОАВда текширув хизматчиларга фойдали тарзда кўрсатилганини таъкидлади.

«Ҳар доимгидек бўлмайди, эркаклар! Мен сизларга мослашмоқчи эмасман. Агар келажакдаги урушда, худо кўрсатмасин, у содир бўлса, тирик қолмоқчи бўлсангиз, сиз бош қўмондонга мослашасиз. Агар баъзиларимиз каби ишимизни шу тарзда давом эттирадиган бўлсак, нафақат биз, балки қўл остимиздагилар ҳам тирик қолмайди», — деди Лукашенко.