Amnesty International Rossiyada «istalmagan tashkilot» deb e’lon qilindi

Prokuratura bayonotiga ko‘ra, Amnesty International Londonda joylashgan bosh ofis orqali «rusofobik loyihalar»ni amalga oshirgan, Ukrainaga yordam ko‘rsatishga chaqirgan va Rossiyani siyosiy hamda iqtisodiy jihatdan yakkalashtirishga urinishda ayblangan. Shuningdek, tashkilot «ekstremistik guruhlar»ni qo‘llab-quvvatlash va «xorijiy agentlar» faoliyatini moliyalashtirishda ayblanmoqda. Amnesty International rahbari Agnes Kallamard bu qarorni Rossiyada fuqarolik jamiyatini sukutga solishga qaratilgan harakat deb baholadi va tashkilot inson huquqlari buzilishlarini hujjatlashtirishni davom ettirishini ma’lum qildi. Bu qaror Rossiyada mustaqil tashkilotlar va jurnalistlarga nisbatan bosimlar kuchaygan bir paytda qabul qilindi. Hozirda Rossiyaning «istalmagan tashkilotlar» ro‘yxatida 223 ta tashkilot mavjud bo‘lib, ular orasida Radio Free Europe, Chatham House va Transparency International kabi xalqaro tashkilotlar ham bor. Amnesty International 1961 yilda tashkil etilgan bo‘lib, dunyo bo‘ylab inson huquqlarini himoya qilish va adolatni ta’minlashga qaratilgan faoliyat olib boradi. Tashkilot Rossiyada inson huquqlari buzilishlari va Ukrainadagi harbiy jinoyatlarini hujjatlashtirib kelmoqda.