АҚШ Эрон билан савдо қилувчи давлатларга бож жорий қилмоқда

АҚШ президенти Доналд Трамп Эрон билан иқтисодий алоқаларни сақлаб қолаётган мамлакатларга нисбатан янги савдо чекловини эълон қилди. Унга кўра, Эрон билан тижорат муносабатларини давом эттираётган давлатлар АҚШ билан савдода қўшимча 25 фоизлик бож тўлайди.

Трамп бу қарорни ўзининг «Truth Social» ижтимоий тармоғида эълон қилиб, чора «дарҳол кучга киргани» ва «қатъий ва якуний» эканини таъкидлади. Ҳозирча Оқ уй томонидан қарорнинг тўлиқ расмий матни эълон қилинмаган.

BBC маълумотларига кўра, Эроннинг энг йирик савдо ҳамкори Хитой ҳисобланади. Кейинги ўринларда Ироқ, БАА, Туркия ва Ҳиндистон жойлашган.

Туркиянинг Эрон билан энг фаол савдо қиладиган беш давлат қаторида эканлиги янги қарор Туркияда катта муноазараларни келтириб чиқармоқда.

Таҳлилчиларнинг таъкидлашича, асосий ноаниқлик янги бож қандай қўлланилиши билан боғлиқ. «CNN Türk»нинг АҚШдаги мухбири Юнус Поксўйнинг қайд этишича, Туркияга аввалдан 15 фоизлик қўшимча бож қўлланиб келинган. Янги қарор билан бу ставка 15 фоиз устига яна 25 фоиз қўшиладими ёки Эрон билан савдони тўхтатмаган барча давлатларга ягона тартибда жорий этиладими — бу масала ҳали очиқ қолмоқда.

Расмий қарор матни эълон қилинмагунча, Туркия–АҚШ савдо муносабатларига таъсир кўлами ва иқтисодий оқибатларини аниқ баҳолаш қийин. Бироқ иқтисодчиларнинг фикрича, агар янги бож чоралари тўлиқ амалга оширилса, бу Туркия экспортига, айниқса АҚШ бозорига йўналтирилган маҳсулотларга сезиларли босим ўтказиши мумкин.