AQSH G7 doirasida Rossiya nefti narxi chegarasini pasaytirishga qarshi chiqmoqda

Yakuniy qaror Prezident Donald Trampga bog‘liq bo‘lib qolmoqda va manbalarga ko‘ra, ba’zi rasmiylar hali ham ijobiy o‘zgarishdan umid uzmagan. Biroq joriy yil boshida G7 moliya vazirlari uchrashuvida AQSH qayd etgan pozitsiya hozircha o‘zgarmagan, deb yozmoqda Bloomberg. Yevropa Ittifoqi va Buyuk Britaniya Rossiyaning Ukrainaga qarshi urushini moliyalashtiruvchi neft daromadlarini cheklash maqsadida narx chegarasini hozirgi 60 dollardan 45 dollarga tushirishni taklif qilmoqda. YeI bu taklifni Moskvaga qarshi navbatdagi sanksiyalar paketiga ham kiritgan. Oq uy juma kuni bu masala yuzasidan izoh berishdan bosh tortdi. So‘nggi 24 soat ichida Isroilning Eronga qarshi hujumlari ortidan neft narxlari oshdi. G7 belgilangan chegaradan past bo‘lgan narxlar yana ko‘tarilib, West Texas Intermediate (WTI) neft xomashyosi fyucherslari 7 foizdan ziyod o‘sib, barreli 73 dollarga yaqinlashdi. Bu 2022 yil mart oyidan beri eng katta bir kunlik o‘sish bo‘ldi. Manbalardan biri YeI va Buyuk Britaniya AQSHsiz ham narx chegarasini pasaytirishni ko‘rib chiqishi mumkinligini bildirdi. Rossiya nefti asosan Yevropaga yaqin suvlar orqali tashiladi, shuning uchun bu harakat mustaqil amalga oshirilsa ham muayyan ta’sir ko‘rsatishi mumkin. Biroq G7’ning barcha a’zolari ishtirok etadigan kelishuv ko‘proq samara berishi mumkin, chunki u holda AQSHning nazorat va ijro mexanizmi ham ishga tushadi.