AQSH Kubaga nisbatan yangi bosim ssenariysini muhokama qilmoqda
Vashingtondagi muhokamalar Kubaga nisbatan yangi, ancha qattiq bosim usullari ishlab chiqilayotganini ko‘rsatmoqda, bu esa mintaqadagi vaziyatni keskinlashtirishi mumkin.
«Politico» nashri ma’lumotiga ko‘ra, AQSH prezidenti Donald Tramp ma’muriyati Kubaga nisbatan rejimni almashtirishga qaratilgan yangi ssenariylarni ko‘rib chiqmoqda. Nashr manbalarining ta’kidlashicha, muhokama qilinayotgan variantlar orasida orolga neft importini to‘liq to‘sib qo‘yish, ya’ni de-fakto dengiz qamalini joriy etish ham bor.
Bu chora hozircha rasman tasdiqlanmagan bo‘lsa-da, ma’muriyatdagi ayrim guruhlar tomonidan faol ilgari surilmoqda.
Ikki manbaning aytishicha, ushbu tashabbusni Kuba hukumatiga keskin qarshi bo‘lgan doiralar qo‘llab-quvvatlamoqda va u AQSH davlat kotibi Marko Rubio tomonidan ham ma’qullangan. Shu bilan birga, Oq uy ichida bunday keskin qadamning oqibatlari yuzasidan jiddiy bahslar ketmoqda.
Muhokamalar Kuba iqtisodiyoti allaqachon zaiflashgan bir paytda olib borilmoqda.
Neft va humanitar xavf
«Politico»ga ko‘ra, Venesuela nefti yetkazib berilishining qisqarishi Kuba iqtisodiyotiga katta zarba bergan. Havana ilgari ushbu neftning bir qismini qayta sotish orqali chet el valutasini jalb qilib kelgan. To‘liq blokada esa bu imkoniyatni butunlay yo‘qqa chiqaradi.
Ma’muriyat ichidagi qarshi taraf fikricha, neft importining to‘liq to‘xtatilishi orolda keng ko‘lamli humanitar inqirozga olib kelishi mumkin. Biroq tashabbus tarafdorlari energetik bosimni «bo‘g‘uvchi halqa» deb atab, uni rejimni ag‘darishning eng samarali usuli sifatida ko‘rmoqda.
Manbalardan biriga ko‘ra, Oq uy Kubadagi hokimiyat almashinuvini «2026 yilda albatta sodir bo‘ladigan voqea» sifatida ko‘rayotgani ham muhokamalar ruhiyatini ochib beradi.
Qonunlar va siyosiy fon
Bu harakatlar AQSHda 1994 yilda qabul qilingan LIBERTAD qonuniga, ya’ni Helms–Berton qonuniga tayanilishi mumkin. Ushbu hujjat Kubaga qarshi savdo va moliyaviy embargoni qonun darajasida mustahkamlab qo‘ygan.
Respublikachilarning «sorlochinlar» qanoti tashabbusni ochiq qo‘llab-quvvatlamoqda. Xususan, Florida senatori Rik Skott «Kubaga na sent, na neft berilmasligi kerak», — deya bayonot bergan.
Avvalroq «The Wall Street Journal» AQSH ma’muriyati Kuba hukumati ichida hokimiyatni ag‘darishga yordam bera oladigan shaxs qidirayotganini xabar qilgan edi. Davlat departamenti esa Kubada «demokratik va AQSH manfaatlariga zid bo‘lmagan hukumat» bo‘lishi milliy xavfsizlik uchun muhimligini ta’kidlamoqda.
