AQSH sudi tariflarni bekor qilishi ortidan neft narxi o‘smoqda

Londondagi savdolar davomida Brent nefti fyucherslari 0,65 foizga qimmatlashib, bir barrel uchun 65,32 dollar darajasiga yetdi. WTI nefti esa 0,61 foizga oshib, 62,22 dollarni tashkil qildi. Bu o‘sish, AQSH savdo sudining Donald Tramp tomonidan joriy etilgan keng qamrovli import bojlarini bekor qilishi bilan bog‘liq. Sud qaroriga ko‘ra, prezident mazkur bojlarni joriy etish vakolatiga ega bo‘lmagan. Bu dunyo iqtisodiyoti uchun xatarlarni kamaytiradi va, natijada, neftga bo‘lgan talabni oshiradi, deb hisoblaydi ekspertlar. «Investorlar iqtisodiy noaniqlikdan qisqa fosila oldilar», — deydi City Index kompaniyasidan Mett Simpson. Shu bilan birga, bozorlar OPEC+ tashkilotining yaqindagi yig‘ilishiga diqqat qaratgan. Reuters manbalariga ko‘ra, alyans kunlik qazib chiqarish kvotasini 411 ming barrelgacha  oshirishga kelishishi mumkin. ING tahlilchilari bu tendensiya uchinchi chorak oxirigacha davom etishini kutmoqda. Yana bir xavf — Chevron kompaniyasining Venesueladagi faoliyatini to‘xtatishi bo‘ldi. Vashington tomonidan berilgan litsenziyaning qaytarilishi kompaniyani neft qazib olish va boshqa operatsiyalarni to‘xtatishga majbur qildi. AQSHdagi neft va benzin zaxiralari kamaygani, ammo distillyatlar zaxirasi ko‘paygani haqida Amerika neft instituti xabar berdi. Treyderlar hozirda soat 21:00 da chiqarilishi kutilayotgan Energetika axborot boshqarmasi ma’lumotlarini kutmoqda.