AQSH Venesuelaning vaqtinchalik rahbariga to‘rt talab qo‘ydi

AQSH ma’muriyati Venesuela vaqtinchalik rahbari Delsi Rodrigesga nisbatan aniq talablar ro‘yxatini shakllantirdi. Agar bu shartlar bajarilmasa, u ham hibsga olingan sobiq prezident Nikolas Maduro taqdirini takrorlashi mumkin. Bu haqda «Politico» nashri AQSH ma’muriyatidagi manbaga tayanib xabar bermoqda.

Manbalarga ko‘ra, Donald Tramp ma’muriyati Rodrigesdan kamida to‘rtta asosiy qadamni kutmoqda.

Birinchi talab — Venesuelada narkotrafikka qarshi kurashni keskin kuchaytirish. AQSH tomoni mamlakat hududi xalqaro narkotik kanallari uchun tranzit markaz bo‘lib qolganini xavf sifatida baholamoqda.

Ikkinchi talab — AQSHga dushman deb hisoblangan davlatlar va tarmoqlarga mansub shaxslarni mamlakatdan chiqarib yuborish. Gap, avvalo, Eron, Kuba hamda boshqa davlatlarning maxsus xizmat vakillari haqida ketmoqda. Vashington Venesuela hududi AQSHga qarshi operatsiyalar uchun «boshqaruv markazi»ga aylanishini mutlaqo qabul qilmasligini bildirgan.

Uchinchi talab neft sohasiga taalluqli. AQSH Venesuela neftining Amerikaga qarshi davlatlarga sotilishini to‘xtatishni talab qilmoqda. Manbalarga ko‘ra, bu talab bajarilmasa, iqtisodiy bosim va sanksiyalar saqlanib qoladi.

To‘rtinchi, eng siyosiy jihatdan sezgir talab — Venesuelada erkin va adolatli saylovlar o‘tkazishga ko‘maklashish va keyinchalik hokimiyatdan ketish. AQSH ma’muriyati Rodrigesni o‘tish davri rahbari sifatida ko‘rib, uning doimiy prezident bo‘lib qolishini istisno qilayotganini ochiq bildirgan.

Manbalar ta’kidlashicha, ushbu talablarni bajarish muddatlari vaziyatga qarab o‘zgarishi mumkin. Biroq Vashington uchun asosiy mezon — Venesueladagi hokimiyat AQSH manfaatlariga tahdid solmasligi hisoblanadi.