Armaniston Rossiya gazi qimmatlashsa, Turkmanistondan sotib oladi

Armaniston Rossiyadan import qilinadigan tabiiy gaz narxi oshishi ehtimoliga qarshi muqobil ta’minot manbalarini o‘rganmoqda. Bu haqda Armaniston Davlat xizmatlarini tartibga solish komissiyasi raisi Mesrop Mesropyan ma’lum qildi.

Uning so‘zlariga ko‘ra, mamlakat uchun mintaqada bir nechta alternativ variantlar mavjud. Xususan, Ozarbayjon, Turkmaniston va Eron gaz yetkazib berishi mumkin bo‘lgan davlatlar sifatida qaralmoqda.

«Infratuzilmasi bizga ushbu davlatlardan gaz sotib olish imkonini beradigan barcha mamlakatlardan tabiiyki gaz xarid qilishimiz mumkin», — dedi Mesropyan.

Shu bilan birga, u Rossiya gazi narxi oshgan taqdirda ham aholi uchun amaldagi gaz tariflari 2027 yil boshigacha o‘zgarmasligini ta’kidladi.

Energiya bozori xavotiri

Mesropyanning qayd etishicha, Armanistonda ishlab chiqariladigan elektr energiyasining taxminan 30–35 foizi issiqlik elektr stansiyalariga to‘g‘ri keladi.

Shu sababli tabiiy gaz narxining sezilarli darajada qimmatlashi elektr energiyasi tariflariga ham bosim o‘tkazishi mumkin. Bu esa mamlakatning energetika xarajatlari va inflatsiya ko‘rsatkichlariga ta’sir qilishi ehtimolini oshiradi.

Mutaxassislar fikricha, gaz ta’minoti manbalarini diversifikatsiya qilish Armanistonning energetik xavfsizligini mustahkamlashga xizmat qilishi mumkin.

Moskva bilan shartnoma

Armaniston bosh vaziri Nikol Pashinyan esa Rossiya gazi narxi oshishini ehtimoli past deb baholadi.

Uning 11-iyun kuni o‘tkazilgan brifingda aytishicha, Yerevan va Moskva o‘rtasida uzoq muddatli shartnoma amal qilmoqda. Pashinyan bir tomonning shartnoma shartlaridan voz kechishi «kelishuvga zid harakat» bo‘lishini ta’kidladi.

Shu bilan birga, Armaniston hukumati ehtimoliy narx o‘zgarishlari yuz bergan taqdirda barcha ssenariylarni ko‘rib chiqishda davom etayotganini bildirdi.