Avtobus va tez yordam mashinalariga tashvish tugmalari o‘rnatiladi
O‘zbekistonda yo‘nalishli avtobuslar va tez yordam mashinalarida xavfsizlikni kuchaytirish maqsadida tashvish tugmalari joriy etilishi belgilab qo‘yildi.
Prezident qaroriga muvofiq, O‘zbekistonda yo‘nalishli avtobuslar va tez yordam avtomobillariga bosqichma-bosqich tashvish tugmalari o‘rnatish amaliyoti yo‘lga qo‘yiladi. Mazkur qaror ichki ishlar organlarining qo‘riqlash sohasidagi faoliyatini samarali tashkil etishga qaratilgan.
Ichki ishlar vazirligi Transport vazirligi va Sog‘liqni saqlash vazirligi bilan hamkorlikda jamoat tartibini ta’minlash, yo‘lovchilar va tibbiyot xodimlari xavfsizligini kuchaytirish maqsadida maxsus qo‘riqlash xizmatlarini yo‘lga qo‘yadi. Bu xizmatlar shartnoma asosida amalga oshiriladi.
2026 yil 1-yanvardan boshlab, qo‘riqlovda bo‘lgan banklar, yirik ishlab chiqarish korxonalari, mahalliy hokimliklar va boshqa ob’ektlarga Ichki ishlar vazirligining «Xavfsiz shahar» markazi tomonidan yuzni tanish imkoniyatiga ega kameralar o‘rnatilishi belgilangan. Ushbu texnik vositalar tegishli axborot bazalari bilan integratsiya qilinadi.
Qo‘riqlanadigan ob’ektlar yoki xonadonlardan kelayotgan tashvish signallari bir vaqtning o‘zida yagona tezkor boshqaruv markazlari va hudud profilaktika inspektorlari hamda patrul-post xizmatlari planshetlariga yuboriladi. Bu tizim tezkor chora ko‘rish imkoniyatlarini kengaytiradi.
2026 yildan boshlab texnikaviy qo‘riqlov xizmatlari uchun ob’ektlarni turlarga ajratgan holda differensial to‘lov tizimi joriy qilinishi belgilangan. Shu bilan birga, Ichki ishlar vazirligi o‘ta muhim va toifalangan ob’ektlarni 2026 yil yakuniga qadar uchuvchisiz uchadigan apparatlarga qarshi vositalar va ushbu apparatlarning o‘zi bilan jihozlashni rejalashtirmoqda.
Vazirlik 2026 yil 1-martga qadar «E-Qo‘riqlash» elektron platformasini ishga tushiradi. Bu platforma raqamli boshqaruv va qo‘riqlash xizmatlarini yanada takomillashtirishi kutilmoqda.
Shuningdek, «Xavfsiz ta’lim» konsepsiyasi ham amaliyotga joriy etiladi. Unga ko‘ra, barcha davlat va nodavlat ta’lim muassasalari, shuningdek, xorijiy ta’lim tashkilotlari filiallari jismoniy va texnikaviy jihatdan qo‘riqlanadi. Inshootlarga videokuzatuv vositalari, qo‘riqlash signalizatsiyalari va tashvish tugmalari o‘rnatiladi.
