Baxtiyor Islomov Oliy sud raisi lavozimidan ozod etiladi

Prezident tomonidan Baxtiyor Jahongirovich Islomovni O‘zbekiston Respublikasi Oliy sudi raisi lavozimidan ozod etish to‘g‘risida Oliy Majlis Senatiga taqdimnoma kiritildi. Bu haqda tegishli ma’lumotlar e’lon qilindi.

Baxtiyor Islomov 2022 yil avgust oyida Oliy Majlis Senati majlisida O‘zbekiston Respublikasi Oliy sudi raisi etib saylangan edi. U mehnat faoliyati davomida Farg‘ona va Toshkent viloyatlarida sudyalik qilgan. Shuningdek, 2020 yil noyabrigacha jinoyat ishlari bo‘yicha Toshkent shahar sudi raisi lavozimida ishlagan.

2020 yil noyabr oyida prezidentning fuqarolar huquqlarini himoya qilish va murojaatlar bilan ishlash masalalari bo‘yicha maslahatchisi Tursunxon Xudoyberganovning birinchi o‘rinbosari etib tayinlangan. Oradan bir yil o‘tib, prezidentning huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi lavozimida ish boshlagan.

Robaxon Mahmudova nomzodi ko‘rsatildi

Shu bilan birga, Prezident tomonidan Robaxon Anvarovna Mahmudovani O‘zbekiston Respublikasi Oliy sudi raisi lavozimiga saylash to‘g‘risida ham Oliy Majlis Senatiga taqdimnoma kiritildi.
Bu haqda Prezident matbuot kotibi ma’lum qildi.
Robaxon Mahmudova hozirda O‘zbekiston “Adolat” sotsial-demokratik partiyasi siyosiy kengashi raisi hamda Oliy Majlis Qonunchilik palatasidagi partiya fraksiyasi rahbari hisoblanadi.

U 1958 yil 9-noyabrda Farg‘ona viloyatining Farg‘ona tumanida tug‘ilgan. 1983 yilda Toshkent davlat universitetining huquqshunoslik fakultetini tamomlagan.

Mehnat faoliyati davomida Farg‘ona viloyati Xalq qabulxonasi mudiri, Oliy Majlis Senatining Fan, ta’lim va sog‘liqni saqlash masalalari qo‘mitasi raisi, O‘zbekiston Oliy sudi raisining birinchi o‘rinbosari — ma’muriy ishlar bo‘yicha sudlov hay’ati raisi lavozimlarida ishlagan.

Robaxon Mahmudova 2020 yil yanvar va 2024 yil dekabr oylarida bo‘lib o‘tgan prezidentlik saylovlarida O‘zbekiston Respublikasi Prezidentligiga nomzod sifatida ishtirok etgan.