Belgiya kompaniyasi O‘zbekistonda logistika markazlari qurishga qiziqish bildirmoqda
Bryusselda bo‘lib o‘tgan uchrashuvda transport vaziri Ilhom Maxkamov va «Ahlers Logistics» rahbari Van den Bos Deyv O‘zbekistonda zamonaviy logistika markazlari tashkil etish loyihasini muhokama qildi.
Bryusselda O‘zbekiston transport vaziri Ilhom Maxkamov Belgiyaning «Ahlers Logistics» kompaniyasi ijrochi direktori Van den Bos Deyv bilan uchrashdi. Suhbat davomida kompaniyaning mamlakat hududida logistika markazlari barpo etishga bo‘lgan qiziqishi va hamkorlik imkoniyatlari muhokama etildi.
Uchrashuvda belgiyalik tadbirkor O‘zbekistonda mahalliy sheriklar bilan hamkorlikda zamonaviy logistika infratuzilmasini yaratish taklifini ilgari surdi. Bu loyiha xalqaro yuk tashish tarmoqlarini takomillashtirish va mintaqaviy savdo oqimini jadallashtirishga xizmat qilishi ta’kidlandi.
Tomonlar suhbat chog‘ida mamlakatimizda transport va logistika sohasini rivojlantirish bo‘yicha amalga oshirilayotgan islohotlar, yuk tashish infratuzilmasini kengaytirish hamda logistika markazlarini modernizatsiya qilishga oid hukumat qarorlari haqida fikr almashdilar.
Shuningdek, ikki tomon hamkorlikning kelgusi yo‘nalishlarini belgilab oldi. Vazir Ilhom Maxkamov Van den Bos Deyvni joriy yil 11–12 noyabr kunlari Toshkentda o‘tkaziladigan transport va logistika sohasidagi xalqaro tadbirlarda ishtirok etishga taklif qildi.
«Ahlers Logistics» kompaniyasi Yevropada va Osiyoda yuk tashish, omborxona xizmatlari hamda ta’minot zanjirini boshqarish bo‘yicha katta tajribaga ega xalqaro operator hisoblanadi. Kompaniyaning O‘zbekistondagi loyihalari kelgusida mintaqaning logistika markaziga aylanishida muhim rol o‘ynashi mumkin.
