Bishkek uchun yangi bosh reja qabul qilindi

Qirg‘iziston poytaxti Bishkek shahrining 2050-yilgacha mo‘ljallangan bosh rejasi tasdiqlandi. Hukumatning tegishli qarori 2026-yil 25-aprelda imzolangan bo‘lib, uni Vazirlar Mahkamasi raisi Odilbek Qosimaliyev qabul qilgan.

Qarorga ko‘ra, bosh reja shahar hududini rivojlantirishning asosiy hujjati hisoblanadi va ijtimoiy-iqtisodiy dasturlar, sohaviy rejalar hamda qurilish va yerdan foydalanish bo‘yicha qarorlarda majburiy ravishda inobatga olinadi.

Shuningdek, funksional zonalashtirish belgilanmagan hududlarda yerdan foydalanish turlari va shaharsozlik qoidalari alohida hukumat qarori bilan belgilanadi.

Rejani o‘zgartirish

Bosh rejaga o‘zgartishlar ham faqat alohida qaror asosida kiritiladi. Ushbu reja yer amnistiyasiga tushgan obyektlarga tatbiq etilmaydi;

Ilgari ishlab chiqilgan, ammo amalga oshirilmagan shaharsozlik hujjatlari yangi bosh rejaga moslashtiriladi (amalda arxitektura xulosasi olingan obyektlar bundan mustasno).

Qaror rasman e’lon qilinganidan so‘ng 10 kun ichida kuchga kiradi.