Bitcoin yig‘uvchi xorijiy kompaniya 17,44 mlrd dollar zarar ko‘rdi
Kriptovalyuta bozoridagi pasayish «Strategy» kompaniyasining Bitcoin zaxiralari qiymatiga jiddiy ta’sir ko‘rsatgani ma’lum qilindi.
Bitcoin jamg‘arish strategiyasiga tayangan «Strategy» kompaniyasi 2025 yilning to‘rtinchi choragida raqamli aktivlar bo‘yicha 17,44 mlrd AQSH dollari miqdorida amalga oshirilmagan zararni qayd etdi, deya xabar qildi «Reuters». Bu holat kompaniya kriptovalyuta zaxiralari qiymatining pasayishi bilan bog‘liq bo‘lib, bozordagi keskin tebranishlar moliyaviy natijalarga ta’sir ko‘rsatganini anglatadi.
Kompaniya asoschisi va strategiyaning asosiy tashabbuskori Maykl Seylor tomonidan ilgari surilgan yo‘nalish doirasida, «Strategy» Bitcoin’ning eng yirik korporativ egalaridan biri hisoblanadi. Biroq 2025 yil davomida kriptovalyuta bozoridagi beqarorlik investorlar kayfiyatiga salbiy ta’sir ko‘rsatdi va kompaniya aksiyalari qiymati taxminan 47,5 foizga pasaydi.
2025 yil 31-dekabrda yakunlangan moliyaviy yil natijalariga ko‘ra, «Strategy» raqamli aktivlar bo‘yicha jami 5,40 mlrd dollarlik amalga oshirilmagan zararni e’lon qildi. Dekabr oyida esa Bitcoin kursi zaiflashgani sababli kompaniya 2025 yil uchun daromadlar prognozi qayta ko‘rib chiqilib, qisqartirildi.
So‘nggi haftalarda kripto bozoridagi yuqori darajadagi beqarorlik balanslarida Bitcoin va boshqa tokenlar mavjud bo‘lgan kompaniyalar uchun qo‘shimcha bosimni kuchaytirdi.
2026 yil 4-yanvar holatiga ko‘ra, «Strategy»ning AQSH dollaridagi naqd zaxiralari 2,25 milliard dollarni tashkil etdi. Kompaniya ushbu likvid zaxiralarni imtiyozli aksiyalar bo‘yicha dividendlar hamda mavjud qarz majburiyatlari bo‘yicha foiz to‘lovlarini o‘z vaqtida ta’minlash maqsadida saqlab kelmoqda.
