Божхона декларациясини электрон шаклда топшириш мумкин

Адлия вазирлиги томонидан йўловчи божхона декларациясини тўлдириш ва расмийлаштириш тартибига ўзгартиш ва қўшимчалар киритилди. Янги тартибга кўра, декларацияни мобил илова орқали электрон шаклда топшириш мумкин бўлади.

Мазкур ўзгартишга мувофиқ, йўловчи божхона декларациясининг электрон шакли божхона органларининг ахборот тизимида мобил илова орқали автоматик равишда шакллантирилади. Бу эса чегара назоратида қоғозбозликни қисқартириш ва жараённи тезлаштиришга хизмат қилади.

Декларацияни тўлдириш жараёнида аниқланган хатоликлар божхона ходими томонидан тузатилади

Янги қоидаларда фуқароларга қўшимча қулайликлар ҳам назарда тутилган. Жумладан, декларацияни тўлдириш жараёнида аниқланган техник хато ва камчиликлар божхона ходими томонидан тузатилиши мумкинлиги белгиланган.

Шунингдек, агар товар ёки буюм 16 ёшга тўлмаган шахсга тегишли бўлса, декларациянинг «товар номи» ва «буюм номи» устунларида эгасининг паспорт ёки ID-карта рақами ҳам кўрсатилиши шарт.

Яна бир муҳим жиҳат — мобил қурилмаларни олиб киришда божхона тўловлари ундирилмайдиган чекланган меъёрлардан қатъи назар, улар мажбурий тарзда декларация қилиниши лозим. Бироқ тизим оператори базасида рўйхатга олинган ва Ўзбекистон ҳудудида сотиб олинган мобил қурилмалар бундан мустасно ҳисобланади.

Ушбу янгилик рақамли хизматлар кўламини кенгайтириш ва божхона тартиб-таомилларини соддалаштиришга қаратилган навбатдаги қадам сифатида баҳоланмоқда.