Bolgariya kelasi yili yevro hududiga qo‘shilishi mumkin

Yevroni qabul qilish Bolgariyaga Yevropa Ittifoqi mamlakatlari bilan savdo aloqalarini kuchaytirish, tranzaksiya xarajatlarini kamaytirish va Bryusseldagi ta’sirini oshirish imkonini beradi. Hozirda bolgar levi yevro bilan bog‘langan bo‘lsa-da, mamlakat YeSBning pul-kredit siyosatini belgilashda ishtirok etmaydi. Yevrozonaga qo‘shilish natijasida Bolgariya markaziy banki rahbari Yevropa Markaziy bankining boshqaruv kengashida rasmiy o‘ringa ega bo‘ladi. Bu mamlakatning Yevropa moliyaviy siyosatlariga ta’sirini oshiradi. Biroq tanqidchilar yevroni qabul qilish inflyatsiyani oshirishi va ayniqsa, qishloq joylardagi aholiga salbiy ta’sir ko‘rsatishi mumkinligini ta’kidlamoqda. Prezident Rumen Radev bu xavotirlar fonida yevroni joriy etishni kechiktirish bo‘yicha referendum o‘tkazish niyatini bildirgan, ammo mamlakat Konstitutsiyaviy sudi bunday ovoz berishni qonuniy deb topmasligi mumkin. Bolgariya avvalroq 2024 yil 1 yanvardan yevroni joriy etishni rejalashtirgan edi, ammo siyosiy beqarorlik bu rejalarni kechiktirdi. Hozir mamlakat yevroni 2026 yildan joriy etishga tayyorgarlik ko‘rmoqda.