Bo‘stonliqda 5 aka-ukaning xonadonidan 9 kilo narkotik topildi
10.10.2025 | 10:2019954
Tezkor tadbirlar natijasida katta miqdorda giyohvandlik vositalari, qurol-aslahalar va noqonuniy dorilar topilib, bir nechta shaxslarga nisbatan jinoyat ishi qo‘zg‘atilgan.
Toshkent va Farg‘ona viloyatlari hamda Toshkent shahridagi tezkor tadbirlarda katta miqdordagi giyohvandlik vositalari va u bilan bog‘liq noqonuniy qurol saqlash holatlari fosh etildi va bir nechta shaxslarga nisbatan jinoyat ishlari qo‘zg‘atildi. Bu haqda DXX axborot xizmati xabar bermoqda.
Davlat xavfsizlik xizmatining va Ichki ishlar organlarining Bo‘stonliq tumanida o‘tkazgan tekshiruvida besh aka-uka xonadonlari xolislar ishtirokida ko‘zdan kechirilib, jami 9 kg 14 gramm marixuana, 1 tup kannabis o‘simligi, 1 dona pnevmatik qurol, 21 dona patron, 19 dona gilza, rezina tayoqcha va boshqa ashyoviy dalillar topilgan. Ushbu fuqarolar muqaddam giyohvandlik vositalari savdosi bilan bog‘liq jinoyati uchun sudlangan bo‘lsalarda, o‘z xatolaridan to‘g‘ri xulosa chiqarishmagan. Eng achinarlisi, ular 2003 y.t. 2 nafar farzandlarini ham o‘zlarining qabih ishlariga jalb qilishgan.
Toshkent shahrida Xavfsizlik xizmatining Bojxona qo‘mitasi bilan hamkorlikda o‘tkazilgan tadbirda Yunusobodda «Cobalt» avtomashinasi salonidan 967 grammga yaqin gashish moddasi topilgan. Tekshiruv davomida ushbu shaxsning sherigi va yana bir nafardan 1 kg 992 gramm gashish olindi. Ularga Jinoyat kodeksining tegishli moddalari bilan ayblov qo‘yilib, qamoq ehtiyot chorasi qo‘llanilgan.
Farg‘ona viloyatidagi tezkor tadbirda bir xonadondan 6880 dona «Zardeks» nomli kuchli ta’sir qiluvchi dorilar topildi; tekshiruv ma’lumotlariga ko‘ra, ushbu vositalar Qirg‘iz Respublikasidan aylanma yo‘llar orqali olib kelingan va umumiy qiymati 412 million so‘mni tashkil etgan. Bu holat chegara qo‘shinlari, bojxona va ichki ishlar idoralarining o‘zaro hamkorligi bilan aniqlandi.
Hozirda barcha holatlar bo‘yicha tergov harakatlari olib borilmoqda, dalillar muayyan qilingan va ayblanuvchilarga nisbatan sudgacha va sud jarayonlarida qonuniy choralar qo‘llanadi. Prokuratura va tergov organlari kontrabanda va giyohvandlik moddalari aylanmasini qisqartirish uchun qo‘shimcha chora-tadbirlar rejasini ishlab chiqmoqda.
