«Bu endi tahdid emas»: Polsha Rossiya bilan urushayotganini e’lon qildi

Polsha Milliy Xavfsizlik Byurosi (PMXB) rahbari Slavomir Senskevichning ta’kidlashicha, Polsha Rossiya bilan harbiy mojaro holatida, Moskva Yevropada qo‘poruvchilik, dron hodisalari va kiberhujumlarda ayblanmoqda. «Agar siz kibermakonga qarasangiz, Polsha hozir [Rossiya bilan] urush holatida, u endi tahdid holatida emas», - dedi Senskevich Financial Times nashriga. PMXB rahbarining so‘zlariga ko‘ra, Yevropa Ittifoqi mamlakatlaridagi gibrid hujumlar — ularning havo hududiga uchuvchisiz samolyotlar bostirib kirishdan tortib, suv tizimlari va boshqa muhim infratuzilmani buzishga urinishlargacha — kriptovalyutada to‘langan sabotajchilar tomonidan amalga oshirilgan. «Ushbu to‘lov usuli moliyaviy oqimlarni razvedka idoralaridan yashirishga imkon beradi», - dedi u. Senskevich misol tariqasida 2023 yilda fosh etilgan GRU agent tarmog‘ini keltirdi. O‘shanda Polshada Rossiya foydasiga josuslik qilganlikda ayblanib, o‘ndan ortiq Ukraina va Belarus fuqarolari hibsga olingan edi. Mamlakat ichki xavfsizlik agentligiga ko‘ra, ular Ukrainaga qurol-yarog‘ tashilishini kuzatgan va «Polsha-Ukraina munosabatlarini beqarorlashtirish» maqsadida tashviqot olib borishi kerak bo‘lgan.