CAREC forumi: O‘zbekiston–Qirg‘iziston munosabatlari yangi bosqichda

Bishkek shahridagi CAREC biznes-forumi doirasida Investitsiyalar, sanoat va savdo vaziri Laziz Qudratov Qirg‘iziston iqtisodiyot va savdo vaziri Baqit Sidiqov bilan uchrashdi. Tomonlar o‘zaro tovar ayirboshlash hajmi 14,7 foizga oshganini qayd etib, 2025 yilning 9 oyi yakuniga ko‘ra ko‘rsatkich 672,8 mln AQSH dollariga yetganini ma’lum qildi. 2024 yil yakunida bu ko‘rsatkich 846,1 mln dollarni tashkil etgan.

^{Foto: Vaqtuz tahririyati}

Muloqotda sanoat kooperatsiyasi dasturi va strategik tashabbuslar ro‘yxatini shakllantirishga kelishildi. Shunga qo‘shimcha ravishda, ikki mamlakat rahbarlarining yaqinda bo‘lib o‘tadigan uchrashuvi oldidan siyosiy-iqtisodiy pozitsiyalarni muvofiqlashtirishga tayyorlik bildirildi. Hukumatlararo komissiya faoliyati, mintaqaviy aloqalar va logistika infratuzilmasidan samarali foydalanish kabi masalalar ham muhokama qilindi.

Qo‘shma sanoat loyihalari, O‘zbekiston–Qirg‘iziston investitsiya fondi, Qirg‘izistonda avtotexnika ishlab chiqarish, energetika hamkorligi va transport yo‘nalishlarini rivojlantirish ustuvor yo‘nalish sifatida belgilandi. Shu bilan birga, CAREC maydonidagi hamkorlik istiqbollari keng muhokama qilindi.

Laziz Qudratov CARECning 24-Vazirlar konferensiyasida qatnashib, mintaqaviy savdo va investitsiya sohalarida hamkorlikni chuqurlashtirish zarurligini ta’kidladi. U CARTIF muzokaralarini boshlash tashabbusini qo‘llab-quvvatladi. Konferensiyada O‘zbekiston tomoni raqamli infratuzilma, transport zanjirlarini modernizatsiya qilish va iqlim xavflariga tayyorlik bo‘yicha takliflarini ilgari surdi.

Yig‘ilish yakunida CAREC mamlakatlarida elektron hujjatlar almashinuvi va sertifikatlarni o‘zaro tan olishga oid anglashuv memorandumi, shuningdek, innovatsiyalar va venchur sarmoyalar fondini tashkil etish to‘g‘risidagi hujjatlar imzolandi. Bu tashabbuslar O‘zbekistonning mintaqaviy sherikchilikka sodiq ekanini yana bir bor tasdiqlaydi.