Chat GPT-5: Sun’iy intellektlar orasida yangi bosqich

GPT-5 barcha foydalanuchilariga ham ma’qul kelmagan. Biz ushbu maqolada yangi modelning afzalliklari bilan birga, uning asosiy kamchiliklari haqida ham so‘z yuritamiz. Keling, avval yaxshisidan boshlaylik. Birinchidan, tushunish qobiliyati ancha yaxshilangan. GPT-5 murakkab savollarni kontekst bo‘yicha chuqur tahlil qiladi, so‘zlar ortidagi ma’no va mantiqiy bog‘liqlikni oldingilarga qaraganda ancha yaxshi tushunadi. Bu esa foydalanuvchi bilan muloqotni tabiiyroq va aniqroq qiladi. Ikkinchidan, javob sifati va aniqligi oshgan. Oldingi modellar ba’zan umumiy yoki mavzudan chetlangan javoblar berishi mumkin edi. GPT-5 esa ko‘p bosqichli mantiqiy tahlil va kengroq bilim bazasidan foydalangan holda, aniqroq va faktlarga asoslangan javob beradi. Uchinchidan, uzun matnlar bilan ishlash imkoniyati kengaygan. GPT-5 katta hajmdagi matnlarni tahlil qilib, ularni mantiqiy tuzilishda qayta ishlay oladi. Masalan, yuzlab sahifalik hujjatni o‘qib, qisqa va tushunarli xulosa chiqaradi. Bu boshqa SI tizimlarida cheklangan imkoniyat edi. To‘rtinchidan, multimodal imkoniyatlari kuchliroq. GPT-5 nafaqat matn bilan, balki rasm, diagramma va boshqa turdagi ma’lumotlar bilan ham ishlay oladi. Bu foydalanuvchilarga bir nechta turdagi kontentni bir joyda tahlil qilish imkonini beradi. Bundan tashqari, moslashuvchanlik — GPT-5 foydalanuvchining uslubi va ehtiyojiga tez moslasha oladi. Masalan, bir mavzuni rasmiy, ilmiy yoki oddiy tilda tushuntirish, hatto hazil aralash tarzda yozish ham uning qo‘lidan keladi. Raqobatchilar — Claude, Gemini, Mistral yoki boshqa yirik til modellari ham kuchli, lekin GPT-5ʼning asosiy farqi shundaki, u tezlik, aniqlik va moslashuvchanlikni birlashtirgan. U murakkab mantiqiy masalalardan tortib ijodiy yozuvgacha, texnik hujjat tayyorlashdan tortib oddiy suhbatgacha bo‘lgan barcha vazifalarda barqaror yuqori sifatni saqlaydi. U nafaqat matnni tushunish va yaratishda, balki kod yozish, murakkab matematik masalalarni yechish, vizual ma’lumotlarni tahlil qilish va uzoq kontekstli muloqotlarda ham yuqori natija ko‘rsatadi. Masalan, dasturlash bo‘yicha keng qo‘llaniladigan SWE-bench Verified testida GPT-5 74,9 foiz natija qayd etgan bo‘lsa, bu OpenAIning o3 modelidagi 69,1 foiz va GPT-4 dagi ko‘rsatkichlardan ancha yuqori. Aider Polyglot testida esa 88 foizgacha yetib, kod yozishda xatolik darajasini uchdan bir qismini kamaytirishga muvaffaq bo‘lgan. Matematik sohada ham GPT-5 o‘z kuchini namoyish qildi: AIME 2025 testida kodsiz rejimda 94,6 foiz natijaga erishib, o3 modelining 88,9 foiz ko‘rsatkichini ortda qoldirgan, HMMT musobaqasida esa 93,3 foiz bilan yetakchilik qilgan. Doktorlik darajasidagi murakkab savollardan iborat GPQA Diamond testida vositasiz 85,7 foiz, vositalar bilan ishlaganda esa 87,3 foiz natija qayd etgan. Multimodal imkoniyatlarda ham GPT-5 raqobatchilarini ortda qoldiradi — Humanity’s Last Exam sinovida 25,32 foiz bilan eng yuqori natijani qayd etib, Gemini 2.5 Pro va boshqa ilg‘or modellarni yenggan. Runbear benchmarklarida agentlik talab qiladigan vazifalarda savdo va telekommunikatsiya kabi sohalarda 62–96 foiz diapazonda muvaffaqiyat ko‘rsatgan, matn+grafik tahlil uchun MMMUK yetakchi bo‘lgan. Eng katta afzalliklardan biri – galyutsinatsiya kamayishi: GPT-5 GPT-4o ga nisbatan 45 foiz va o3 ga nisbatan 80 foiz kamroq noto‘g‘ri ma’lumot beradi. «Thinking» rejimida xato ehtimoli 4,8 foizdan 2,1 foizgacha pasaygan, LongFact va FActScore testlarida esa o3 ga qaraganda olti barobar kam xato qayd etilgan. Modelning kontekst oynasi 272 ming tokenni tashkil etadi, bu esa GPT-4 ning 128 ming tokenli limitidan ancha keng va foydalanuvchiga bir necha yuz sahifalik hujjatlarni bir marotaba yuklab tahlil qilish imkonini beradi. Bundan tashqari, GPT-5 foydalanuvchining uslubini eslab qolish, shaxsiy xotira yuritish va savol turiga qarab tezkor yoki chuqur fikrlash rejimiga avtomatik o‘tish qobiliyatiga ega. U real sektorda ham keng qo‘llanmoqda: masalan, BBVA banki moliyaviy tahlillarni soatlar ichida bajaradi, hukumat xizmatlarida esa fuqarolarga avtomatlashtirilgan javob tizimlari joriy etilgan. Microsoft bilan hamkorlikda Copilot orqali Windows 11, Outlook va Visual Studio kabi dasturlarga integratsiya qilingan. Shu omillar GPT-5 ni nafaqat muloqotchi, balki kuchli tahlilchi, dasturchi, ilmiy yordamchi va biznes maslahatchi sifatida ham bozorda yetakchi qiladi, statistik natijalar esa uning texnologik ustunligini yaqqol tasdiqlaydi. Biroq, ChatGPT 5 kutilgan natijani bermagani, OpenAI ham bunga e’tirof etgani haqida ma’lumotlar bor. OpenAI rahbari Sem Altman GPT-5 chiqqandan keyin foydalanuvchilardan kelgan asosiy shikoyatlarga javob berdi. Ko‘pchilik ChatGPT javoblari qisqargani, aniqligi pasaygani va ishlash sur’ati sekinlashganini ta’kidlagan. Altmanning aytishicha, GPT-5 endi «aqlliroq» tuyuladi. Uning so‘zlariga ko‘ra, 8 avgust kuni avtomatik o‘tish funksiyasi ishlamay qolgani sababli butun kun davomida GPT-5 ancha «ahmoqroq» ko‘ringan. OpenAI yaqin kunlarda GPT-5 bilan muloqotni yaxshilaydigan bir qator o‘zgarishlarni joriy etishni rejalashtirgan, ammo har bir foydalanuvchi uchun haqiqatan ham moslashtirilgan sifatli sozlamalar ko‘proq vaqt talab qiladi. Shu bilan birga, ChatGPT’ga GPT-4o ham qayta kiritiladi, ammo faqat pullik obunachilar uchun. Altmanning ta’kidlashicha, OpenAI foydalanuvchilarning bu modelga o‘rganib qolganini kam baholagan. Endi ChatGPT’da modellar o‘rtasida qayta o‘tish imkoniyati paydo bo‘ladi, ammo ular soni kamayadi. GPT-5 joriy etish rejasi kutilganidan ko‘proq vaqt oladi. OpenAI hafta ichida o‘tkazish qobiliyati bo‘yicha muammolar bo‘lishini bashorat qilmoqda. GPT-5 barcha foydalanuvchilar uchun ochilgandan so‘ng, kompaniya ChatGPT Plus obunachilari uchun tezlik limitini ikki barobar oshirishga va’da berdi. Xulosa qilib aytganda, GPT-5 — bu oddiy virtual yordamchi emas, balki bilim va ijodiy fikrlashni uyg‘unlashtirgan sun’iy intellekt tizimi. U foydalanuvchiga nafaqat tezkor javob beradi, balki chuqur tahlil va samarali yechim ham taklif qiladi. Sun’iy intellektlar orasida GPT-5ʼning ustunligi ham aynan shunda — u texnologiyani inson muloqotiga yanada yaqinlashtiradi. Mehrinoza Farmonova tayyorladi.