Davlat idoralarida ijro intizomi kuchaytiriladi — Adliya vazirligi

Adliya vazirligining ma’lum qilinishicha, 2025 yil 23 iyul kuni qabul qilingan mazkur farmon orqali ijro intizomini mustahkamlash bo‘yicha bir qator yangiliklar joriy etiladi. Farmonga ko‘ra, ijro intizomini tashkil etish va uni nazorat qilishda bir nechta asosiy yo‘nalishlar belgilanmoqda. Ularning eng muhimi — davlat rahbariyati hujjatlari ijrosini nazorat qilishda samarali mexanizmlarni joriy etish va bu jarayonga sun’iy intellekt texnologiyalarini tatbiq qilish.   Hisob palatasiga yangi vakolatlar beriladi Farmon bilan Hisob palatasiga quyidagi qo‘shimcha vazifalar yuklatildi:

• qonunlar, farmonlar va qarorlar asosida ajratilgan byudjet mablag‘larining maqsadli sarflanishi va samaradorligini tahlil qilish;
• mansabdor shaxslarning intizomi va javobgarligini kuchaytirishga qaratilgan chora-tadbirlar ishlab chiqish;
• davlat organlari faoliyatini muvofiqlashtirish orqali ijroni ta’minlash.

Bu vazifalarni bajarish uchun 1 sentyabrdan boshlab Hisob palatasiga qo‘shimcha 10 ta shtat birligi ajratiladi. Ular Pensiya jamg‘armasi shtatlaridan qisqartirish hisobiga ta’minlanadi.   Malaka oshirish tizimi joriy qilinadi Endi davlat organlari va tashkilotlaridagi ijroga mas’ul tarkibiy bo‘linmalar alohida tuzilma sifatida birinchi rahbarga bo‘ysunadi. Mazkur bo‘linmalar xodimlari uchun muntazam malaka oshirish amaliyoti yo‘lga qo‘yiladi. Ular Hisob palatasi, Vazirlar Mahkamasi va Adliya vazirligi tomonidan tuzilgan grafik asosida har 3 yilda bir marta o‘qitiladi. Bundan tashqari, qonunchilik hujjatlari va topshiriqlar ijrosining holatini tizimli baholab borish amaliyoti ham joriy etiladi.   Yangi boshqarma tashkil etiladi Farmon asosida Adliya vazirligi markaziy apparatida yangi tuzilma — O‘zbekiston Respublikasi Prezidenti va Hukumat hujjatlari ijrosini nazorat qilish boshqarmasi tashkil etiladi. Ushbu boshqarma 20 ta shtat birligidan iborat bo‘lib, Prezident hujjatlari va hukumat topshiriqlari ijrosini bevosita nazorat qiladi. Mahliyo Hamidova tayyorladi.