Deutsche Bank oltin narxi bo‘yicha prognozini keskin oshirdi
2026 yilda bir unsiya oltin narxi 4450 dollargacha o‘sishi kutilyapti, bu prognoz global kapital bozoridagi o‘zgarishlar ortdagi asosiy drayverlarga tayanilgan holda shakllantirilgan.
2026 yilda oltinning troya unsiyasi 4450 dollargacha qimmatlashishi mumkinligi haqidagi yangi prognoz dunyo moliya bozorlarida keskin qiziqish uyg‘otdi. Reuters agentligining yozishicha, dunyodagi yirik banklardan biri — Deutsche Bank o‘z hisobotini yangi ma’lumotlar asosida qayta ko‘rib chiqqach, oltinni tarixiy darajalarga yetkazishi mumkin bo‘lgan fundamental omillar mustahkamlanmoqda. Bank avvalgi prognoz — 4000 dollar o‘rniga oltinni 4450 dollar etib belgiladi.
Yangilangan hisobotga ko‘ra, 2026 yilda oltin narxi 3950–4950 dollar oralig‘ida savdolanishi mumkin. E’tiborli jihat — yuqori chegara COMEX birjasida 2026 yil dekabr fyucherslari narxidan taxminan 14 foiz yuqori. Bu oltinga nisbatan tez sur’atda o‘suvchi ishonchni aks ettiradi. Deutsche Bank tahlilchilariga ko‘ra, bozordagi ushbu dinamikani ikki asosiy omil qo‘llab turibdi.
Birinchisi — investitsion mablag‘lar oqimi barqarorlashgani. Xususiy investorlar ham, yirik institutsional fondlar ham oltinni yana xavfsiz aktiv sifatida ko‘rishni boshladi. Ikkinchi omil — markaziy banklarning ko‘plab xaridlari. Banklarning oltin sotib olish strategiyasi «barqaror» deb baholanmoqda: regulyatorlar bu jarayonni to‘xtatish niyatida emas.
2024–2025 yillarda ayniqsa Global Janub mamlakatlari va AQSH bilan munosabati keskin davlatlar oltinga qiziqishini keskin oshirdi. Bu jarayon dollarsizlashtirishning amaliy ko‘rinishi sifatida izohlanmoqda. Oltinning afzalligi — uni emissiya qilib bo‘lmaydi, SWIFT orqali blokirovka qilib bo‘lmaydi va sanksiya xavflaridan himoya vositasi sifatida ishlaydi. Markaziy banklar tomonidan qimmatbaho metalga bo‘lgan rekord talab geosiyosiy noaniqliklar kuchaygan bir davrda aktivlarni saqlashning eng xavfsiz yo‘li sifatida qabul qilinmoqda.
