Дунёнинг энг гўзал масканлари эълон қилинди: Рўйхатда Ўзбекистон ҳам бор

«Time Out» нашри 2026-йил учун дунёдаги энг гўзал 51 та жой рўйхатини тақдим этди. Унда табиий манзаралар, тарихий шаҳарлар ва ноёб архитектура объектлари жамланган бўлиб, рейтинг мутахассислар ва саёҳат ёзувчилари тажрибаси асосида шакллантирилган.

Нашр таъкидлашича, рўйхат субъектив характерга эга бўлса-да, унга киритилган ҳар бир манзил муаллифлар томонидан шахсан бориб кўрилган ва баҳоланган. Шунингдек, рейтинг мунтазам равишда янгиланиб, оммавий туризм таъсири ва кам танилган гўзал жойларни оммалаштириш омиллари ҳам инобатга олинади.

Янги рўйхатда Испаниядаги “Picos de Europa” тоғлари биринчи ўринни эгаллади. Ушбу ҳудуд денгизга яқин жойлашган бўлиб, баланд чўққилар, жарликлар ва соҳил манзаралари уйғунлиги билан ажралиб туради.

Кейинги ўринларда Индонезиядаги “Komodo National Park” ва АҚШнинг Нью-Йорк шаҳридаги “Morgan Library and Museum” кутубхонаси жой олган.

Шунингдек, Португалиядаги “Douro Valley”, АҚШдаги “Big Sur” соҳил ҳудуди, Англиядаги “Ullswater” кўли ҳам рўйхатдан ўрин олган. Италиянинг Болонья шаҳридаги тарихий маркази ва Сардиниядаги “Capo Testa” яримороли каби манзиллар эса 2026 йилда илк бор рейтингга киритилди.

Эътиборли жиҳати шундаки, рўйхатдан Ўзбекистон ҳам жой олган. Самарқанд шаҳридаги “Registan Square” дунёнинг энг гўзал манзилларидан бири сифатида қайд этилган. Унда XV–XVII асрларга оид мадрасалар, нақшинкор гумбазлар ва меъморий мажмуалар алоҳида таъкидланган.

​Эслатиб ўтамиз, аввалроқ Самарқанд шаҳри дунёнинг энг хавфсиз ва саёҳат учун қулай шаҳарлари рўйхатидан ҳам жой олган эди.