Endi «chiroyli» avtoraqamlarni mobil ilova orqali xarid qilish mumkin

Joriy yilning 1-yanvaridan boshlab respublika tovar-xomashyo birjasi orqali o‘tkaziladigan autsionlar hamda «chiroyli» raqamlarni oshirilgan stavkalarda berish amaliyoti bekor qilingan edi. Endilikda esa davlat raqam belgilarini sotib olishning yangi yo‘li — «AvtoRaqam» mobil ilovasi ishga tushirildi.

Ushbu tizim orqali jismoniy va yuridik shaxslar, shuningdek, fuqaroligi bo‘lmagan shaxslar quyidagi amallarni bajarishlari mumkin:

Bo‘sh bo‘lgan raqamlar kombinatsiyasini real vaqtda kuzatish;

Tanlangan raqamni band qilish va o‘z nomiga biriktirish;

To‘lovlarni masofaviy shaklda amalga oshirish;

Jarayonni shaxsiy kabinetda nazorat qilish.

Ilova App Store va Play Market platformalarida joylashtirilgan. Tizimning asosiy maqsadi — davlat raqamlarini sotib olish jarayonida shaffoflikni ta’minlash va inson omilini yo‘qotish. Ya’ni endi foydalanuvchi istagan avtoraqamni ilovaning o‘zidan xarid qilishi mumkin.