Eron yadroviy muzokaralarda sanksiyalarni bekor qilish bo‘yicha kafolat talab qilmoqda

Bag‘aiyning so‘zlariga ko‘ra, Eron sanksiyalarning «haqiqiy tugashi» bo‘yicha kafolatlar, jumladan, ularni qanday mexanizm orqali bekor qilish bo‘yicha ma’lumotlarni talab qilmoqda. Uning ta’kidlashicha, AQSH tomoni bu borada yetarlicha aniqlik kiritmagan. AQSH prezidenti Donald Trampning maxsus vakili Stiv Uitkoff tomonidan taqdim etilgan yangi taklifda Eronga faqat fuqarolik maqsadlarida, 3 foizgacha darajada uran boyitishga ruxsat berish nazarda tutilgan. Biroq Tramp keyinchalik bu taklifni rad etib, Eronda har qanday uran boyitishga yo‘l qo‘yilmasligini ta’kidladi. Eron rasmiylari mazkur taklifni «qabul qilib bo‘lmaydigan» deb baholab, uni rad etishga tayyorgarlik ko‘rmoqda. Ularning fikricha, taklifda uran boyitishni to‘liq to‘xtatish va sanksiyalarning qanday bekor qilinishi bo‘yicha aniq reja mavjud emas. Shu bilan birga Eron o‘zining yadroviy dasturi faqat tinch maqsadlarga qaratilganligini ta’kidlab, uran boyitish huquqini saqlab qolishni talab qilmoqda. Tehron xalqaro hamjamiyatdan o‘z huquqlarini hurmat qilishni so‘ramoqda.