Фабио Каннаваро миллий терма жамоанинг январь ойидаги йиғинга жалб этилган футболчилар рўйхатини эълон қилди
БААда бўлиб ўтиши белгиланган йиғинда маҳаллий чемпионатда тўп сурувчи терма жамоага номзод футболчиларнинг жисмоний ҳолатини назорат қилиш режалаштирилган.
Жаҳон чемпионатига тайёргарлик кўриш доирасида Фабио Каннаваро бошчилигидаги Ўзбекистон миллий терма жамоаси январь ойида Бирлашган Араб Амирликларида ўқув-машғулот йиғини ўтказади. Мазкур халқаро тайёргарлик босқичи учун жалб этилган футболчилар рўйхати расман эълон қилинди.
Ўзбекистон футбол ассоциацияси матбуот хизмати маълумотларига кўра, йиғин учун асосан Ўзбекистон Суперлигасида тўп сураётган футболчилар танлаб олинган. Жумладан, рўйхатга 3 нафар дарвозабон, 9 нафар ҳимоячи, 9 нафар ярим ҳимоячи ва 9 нафар ҳужумчи киритилган.
Мураббийлар штаби қарори асосида йиғин айнан Бирлашган Араб Амирликлари ҳудудида ўтказилиши белгиланган. Айни пайтда халқаро футбол тақвимида расмий танаффус мавжуд эмас, шунингдек, кўплаб мамлакатларда миллий чемпионатлар давом этаётгани сабабли хорижда тўп сураётган легионер футболчиларни жалб қилиш имкони чекланган.
Шу боис йиғинда асосан маҳаллий чемпионатда мунтазам иштирок этиб келаётган, миллий терма жамоага номзод сифатида кўрилаётган футболчилар қатнашади. Мураббийлар штаби ушбу йиғин орқали футболчиларнинг жисмоний тайёргарлигини баҳолашни режалаштирган.
Эслатиб ўтамиз, Ўзбекистон миллий терма жамоаси 2026 йилнинг май ойида Ўзбекистон Суперлигасининг етакчи клубларига қарши ўртоқлик учрашувларида иштирок этиши режалаштирилган.
Аввалроқ Ўзбекистон ЖЧ-2026дан қанча маблағ олиши маълум қилинганлиги ҳақида хабар берган эдик.
