Фаластин элчиси Ўзбекистондаги дипломатик фаолиятини якунламоқда

Ўзбекистон ташқи ишлар вазири Бахтиёр Саидов кеча, 9 октябр куни Фаластин элчиси Жавад Муҳаммад Авадни қабул қилди. Бу ҳақда Саидов ўзининг Телеграм-каналида хабар берди. «Мамлакатимизда ўз фаолиятини якунлаётган Фаластиннинг Ўзбекистондаги элчиси Жавад Муҳаммад Авад жаноблари билан учрашдик. Ўзбекистон-Фаластин муносабатларини мустаҳкамлаш ва халқларимиз ўртасидаги дўстликни чуқурлаштириш йўлидаги Элчинининг саъй-ҳаракатларига чин дилдан миннатдорлик билдирамиз», - дея ёзди Ўзбекистон ТИВ раҳбари. Қайд этилишича, Ўзбекистон БМТ резолюцияларига мувофиқ, «икки халқ учун – икки давлат» тамойилини амалга оширишнинг қатъий тарафдори. «Элчи жанобларига келгуси фаолиятида муваффақиятлар тилаймиз», - деди Бахтиёр Саидов.