Futbol bo‘yicha Jahon chempionati to‘rt yilda bir martadan ko‘proq o‘tkazilishi mumkin

FIFA prezidenti Janni Infantino Jahon chempionatiga oid tijorat huquqlarini boshqaradigan yangi kompaniyaning 20–30 foiz ulushini xususiy investorlarga sotish imkoniyatini ko‘rib chiqmoqda. Bu haqda «Financial Times» va «The Telegraph» manbalariga tayanib xabar berdi.

Nashrlar ma’lumotiga ko‘ra, ehtimoliy bitim qiymati 15 milliard funt sterling, ya’ni taxminan 19,9 milliard dollarga baholanmoqda. Manbalarning ta’kidlashicha, kelishuvning asosiy shartlari bo‘yicha dastlabki hujjatlar allaqachon imzolangan.

Yangi kompaniya Jahon chempionatining tijorat huquqlariga egalik qilishi va turnirni boshqarishi kutilmoqda. Shu bilan birga, FIFA nazorat paketini o‘zida saqlab qoladi.

Investorlar jalb qilinadi

Ma’lumotlarga ko‘ra, FIFA tarkibiga kiruvchi 211 ta milliy futbol assotsiatsiyasi ushbu tuzilmada ishtirok etishi mumkin. Xususiy investorlar esa kichik ulushlarni sotib olish imkoniyatiga ega bo‘ladi.

«The Telegraph»ning yozishicha, bitimni tayyorlash jarayonida «JP Morgan» ishtirok etmoqda. Shuningdek, reja AQSH prezidenti Donald Tramp ma’muriyati bilan ham muhokama qilingan.

«Financial Times» manbalariga ko‘ra, texnologik investitsiyalar bilan shug‘ullanuvchi Joshua Kushner o‘zining «Thrive Eternal» jamg‘armasi orqali ushbu bitimga boshchilik qilish bo‘yicha muzokaralar olib bormoqda.

Bahsli tashabbus

Nashrlar yozishicha, Janni Infantinoning FIFAdagi prezidentlik muddati 2031 yilda yakunlanganidan so‘ng, u yangi kompaniyaga komissar sifatida rahbarlik qilishi mumkin.

Qayd etilishicha, ushbu tashabbus futbol jamoatchiligida xavotir uyg‘otadi, chunki bu musobaqaning kengaytirilishiga yoki Jahon chempionatlarini to‘rt yilda bir martadan ko‘proq o‘tkazishga olib kelishi mumkin.