Hindiston chegarasida Myanma isyonchilariga qarshi hujum xavotirlarga sabab bo‘ldi

2 iyun kuni Hindiston harbiylari Myanmaning Sagain hududida joylashgan isyonchilarga qarshi operatsiya o‘tkazdi. Hujum vaqtida havo zarbalari hamda artilleriyadan foydalanilgan. Mahalliy aholining ma’lum qilishicha, hodisa paytida kuchli portlashlar va o‘q uzish ovozlari eshitilgan. Hujumga duchor bo‘lgan hududdagi guruhlar Hindistonga qarshi kurash olib borayotgan etnik manipuri guruhlari ekani aytilmoqda. Ular so‘nggi haftalarda Myanma hududidan turib Hindiston tomoniga bir necha marta hujum qilgani haqida xabarlar tarqalgan. Al Jaziraga intervyu bergan mahalliy fuqarolar xavfsizlik holatidan qattiq xavotirda ekanliklarini bildirdi. «Har kuni portlashlar, har kuni o‘q ovozlari. Biz o‘z uyimizda ham o‘zimizni xavfsiz his qilmayapmiz», — deydi Sagaindagi aholidan biri. Hujumdan so‘ng hududda yuzlab kishi o‘z uyini tark etib, xavfsizroq joylarga ko‘chib o‘tishga majbur bo‘ldi. Mahalliy manbalarga ko‘ra, ba’zi maktablar vaqtincha yopilgan. Myanma rasmiylari bu masalada hali rasmiy bayonot bermagan. Hindiston hukumati esa o‘z navbatida hujum mamlakat xavfsizligini ta’minlash maqsadida amalga oshirilganini ta’kidlamoqda.