Huawei Shanhayda sun’iy intellekt sanoatida Nvidia bilan raqobatga kirishdi

Huawei ushbu tizimni ilk bor aprel oyida e’lon qilgan edi va bu xabar sun’iy intellekt texnologiyalari jamoatida katta qiziqish uyg‘otdi. Mutaxassislarning fikricha, CloudMatrix 384, Nvidia’ning GB200 NVL72 deb nomlangan eng kuchli mahsulotiga to‘g‘ridan to‘g‘ri raqobatchi sifatida ko‘rilayotir. Huawei tizimi 384 ta Ascend 910C chipi bilan jihozlangan bo‘lib, ular «super tugun» (supernode) arxitekturasi orqali o‘zaro yuqori tezlikda bog‘langan. Har bir alohida chip jihatdan Nvidia hali ustun bo‘lishi mumkin, ammo umumiy tizim samaradorligi Huawei tomonidan yaratilgan arxitekturada yuqoriroq natijalar berayotgani ta’kidlanmoqda. SemiAnalysis kompaniyasi asoschisi Dilan Patelning ta’kidlashicha, Huawei ushbu yangi tizimi orqali Nvidia’ni ma’lum jihatlarda ortda qoldirishi mumkin. Amerika eksport cheklovlariga qaramay, Huawei sun’iy intellekt sohasida Xitoydagi yetakchi mahalliy chip ta’minotchisiga aylangan. Nvidia bosh direktori Jensen Huang ham may oyida Bloomberg agentligiga bergan intervyusida Huawei’ning CloudMatrix tizimiga alohida e’tibor qaratgan va kompaniyaning tez sur’atda rivojlanayotganini tan olgan edi. Shu bilan birga, Huawei vakillari Reuters muxbirlarining tizim bo‘yicha qo‘shimcha savollariga javob berishdan bosh tortgan. Biroq kompaniyaning Huawei Cloud bo‘limi rahbari Jan Pingan iyun oyida CloudMatrix 384 tizimi allaqachon kompaniyaning bulut platformasida amaliy ravishda ishlayotganini ma’lum qilgan.