Илон Маскнинг бойлиги бир зумда 84 млрдга кўпайиб, 850 млрд доллардан ошди
«SpaceX» ва «xAI» бирлашуви ортидан Илон Маск дунё тарихида илк бор 850 млрд доллардан ортиқ шахсий капиталга эга бўлди.
«Forbes» ҳисоб-китобларига кўра, Илон Маск бойлиги илк бор 850 млрд доллар чегарасидан ошиб, 852 млрдга етди. Бу сакраш «SpaceX» ва сунъий интеллект йўналишидаги «xAI» компанияларининг бирлашуви ортидан юз берди. Битим натижасида Маск капитали бир зумда 84 млрд долларга ошган.
Янги шаклланган корпоратив тузилманинг умумий қиймати тахминан 1,25 трлн доллар деб баҳоланмоқда. Бу эса уни нафақат дунёнинг энг бой инсони, балки тарихдаги энг катта шахсий капитал соҳиби сифатида ҳам алоҳида ўринга чиқарди.
Бойлик қандай ҳисобланди?
Бирлашувга қадар Маск «SpaceX» компаниясининг тахминан 42 фоизига эгалик қилган бўлиб, бу улуш аввалги 800 млрд долларлик баҳода 336 млрдга тенг эди. Шу билан бирга, унга сунъий интеллект стартапи «xAI»нинг қарийб 49 фоизи тегишли бўлиб, у сўнгги инвестиция раундида 250 млрд долларга баҳоланган.
Бирлашувдан кейин «SpaceX» қиймати 1 трлн, «xAI» эса 250 млрд доллар этиб қайта баҳоланди. Натижада, Маск янги компаниянинг тахминан 43 фоизини назорат қилади ва бу улушнинг қиймати 542 млрд доллар атрофида баҳоланмоқда.
Бошқа активлар
«SpaceX» Илон Маск портфелидаги энг йирик актив бўлиб қолмоқда. Шу билан бирга, у «Tesla» акцияларининг тахминан 12 фоизига эгалик қилади, бу улушнинг бозор қиймати 178 млрд долларни ташкил этади. Қўшимча равишда, унга 124 млрд долларга тенг акция опционлари ҳам тегишли.
Forbes ҳисоб-китобларига кўра, ушбу рақамлар «Tesla» акциядорлари томонидан тасдиқланган улкан компенсация пакетини ўз ичига олмайди. Агар белгиланган молиявий кўрсаткичлар бажарилса, ушбу пакет келгуси ўн йил ичида Маскка қўшимча 1 трлн долларгача акция келтириши мумкин.
