Инфантино узр сўради, аммо FIFA президенти лавозимида қолди
Халқаро турнирларни хусусийлаштириш режаси барбод бўлгач, FIFA раҳбари Жанни Инфантино жиддий босим остида қолган эди. Бироқ Работ шаҳрида ўтган йиғилишда у ўз хатосини тан олиб, раҳбариятнинг қўллаб-қувватловини сақлаб қолишга эришди.
© Getty imagesМарокаш пойтахти Работ шаҳрида ўтказилган FIFA бошқарувининг фавқулодда йиғилишида президент Жанни Инфантино халқаро турнирларни қисман хусусий инвесторларга бериш режасини илгари суришда хатоларга йўл қўйганини тан олди. Шу тариқа у ташкилот раҳбариятининг қўллаб-қувватловини сақлаб қолди ва ўз лавозимида қолди.
Йиғилишдан тўрт соат ўтиб эълон қилинган баёнотда FIFA раҳбарияти Инфантинога ишонч билдиргани маълум қилинди.
«BBC» нашрининг ёзишича, Инфантино ва FIFA бош котиби Маттиас Грофстрём миллий ва минтақавий футбол уюшмаларига мактуб юбориб, йўл қўйилган хатолар учун узр сўраган ва келажакда бундай ҳолатларга йўл қўймасликка ваъда берган.
Баҳсли ташаббус
Можаро Инфантинонинг халқаро турнирлар улушларини хусусий инвесторларга сотиш эвазига миллий конфедерацияларга 40 миллион доллардан тезкор тўлов таклиф қилганидан кейин бошланган.
Бу режа, айниқса, UEFA томонидан кескин танқид қилинди. Натижада FIFA президенти ташаббусни қайтариб олди, бироқ танқидчилар унинг истеъфосини талаб қилишда давом этди.
«BBC» қўлга киритган ички ҳужжатда FIFA бош котиби Маттиас Грофстрём ушбу ҳолатни «Инфантинонинг айби билан юз берган аянчли ҳолат» деб атаган.
Сайлов
Инфантинога нисбатан танқидлар ҳали ҳам тўхтагани йўқ. Канада бош вазири Марк Карни унга бўлган ишончини йўқотганини маълум қилган бўлса, Португалия терма жамоасининг собиқ футболчиси Луиш Фигу FIFA президентини дарҳол истеъфога чиқишга чақирган.
Шунга қарамай, Инфантино 2027 йил март ойида Марокашда бўлиб ўтадиган FIFA конгрессида яна бир муддатга президентлик учун курашиш ниятида. Номзодлар 18 ноябргача рўйхатдан ўтиши керак, сайловда ғалаба қозониш учун эса 211 миллий федерациядан камида 106 тасининг овозини олиш талаб этилади.
Айрим Европа федерациялари Инфантинога овоз бермаслигини билдирган. Бироқ Европа ташқарисида у ҳали ҳам кенг қўллаб-қувватланмоқда. Сўнгги кунларда Миср, Марокаш, Нигер, Мавритания, Конго Демократик Республикаси ва Филиппин футбол федерациялари уни очиқ қўллаб-қувватлашини маълум қилган.
