«Инсоннинг ўз юртида шонли фуқаро бўлаётганини англатувчи илк ҳужжати пул деган тўсиққа дуч келмаслиги керак» — журналист
У қўшни Қозоғистонда биринчи марта ID-карта олиш ўз фуқаролари учун мутлақо бепул экани, Қирғизистонда эса бу тўлов Ўзбекистондагидан камида икки баравар арзонлигини эслатди.
© Ijtimoiy tarmoqlarЎзбекистонда кишининг ўз юртида шонли фуқаро бўлаётганини англатувчи илк ҳужжати пул деган тўсиққа дуч келмаслиги лозим. Бу ҳақда журналист Дилноза Қурбонова ўзининг Facebook саҳифасида ёзди.
У қўшни Қозоғистонда биринчи марта ID-карта олиш ўз фуқаролари учун мутлақо бепул экани, Қирғизистонда эса бу тўлов Ўзбекистондагидан камида икки баравар арзонлигини (8,93 доллар ёки 105 минг 795 сўм) эслатди.
«Кеча пасспорт столида бир манзарага гувоҳ бўлиб, юрагим эзилиб кетди, ичимдан нимадир узилгандек бўлди. Навбатда бир оила турарди. Уст-боши юпун, чеҳраларидан ҳаётнинг оғир заҳматлари, тирикчилик ташвишлари уфуриб турган ота-она ва уларнинг ёнида мўлтирабгина турган 15-16 ёшлардаги қизалоқ. Унинг кўзларида болалик шўхлиги эмас, катталардек бир чуқур ғамгин ўйчанлик бор эди. Улар жигарбандига ҳаётида илк бор шахсини тасдиқловчи ҳужжат — ID-карта олгани келишган экан. Кассадан айтилган суммани эшитгач, отанинг қўллари титраб кетди. Ҳамёнини очиб, ичидаги охирги майда пулларини ҳам битта-битта санай бошлади. Ўша сонияларда отанинг изтиробини, қизининг аввал отасига, кейин ерга қараб қолган нигоҳларини кўриб, юрагим зирқиради», — дея ёзган у.
Журналист Ўзбекистон конституциясининг 1-моддасида «Ўзбекистон — суверен, демократик, ҳуқуқий, ижтимоий ва дунёвий давлат»лиги ёзилганини таъкидлаб, итимоий давлатнинг асл моҳияти оғир дамларда, қийналган оилаларнинг елкасидан юкни олишда кўриниши кераклигини урғулади.
«Инсоннинг ўз юртида шонли фуқаро бўлаётганини англатувчи илк ҳужжати пул деган тўсиққа, отанинг чорасиз титроғига дуч келмаслиги керак. Бу болалар ҳали ҳаётга эндигина қадам қўяётган, давлатнинг меҳри ва ғамхўрлигини ҳис қилиши лозим бўлган вояга етмаган ёшларимиздир», — ёзади у.
Қурбонова шу масала борасида мутасадди вазирликлар ва ҳукуматни чуқур ўйлаб кўришга чақирди.
«Мутасадди вазирликлар, ҳукуматимиз шу масалани бир ўйлаб кўрсалар, адолатдан бўларди. Ҳеч бўлмаса ҳаётида биринчи марта давлат ҳужжати олаётган болажонларимиз учун бу хизматни бепул ёки рамзий нархда қилиб бериш шунчалик қийинми? Ижтимоий давлат деган ном қоғозларда эмас, мана шундай қоракўзларимизнинг бахтли нигоҳларида акс этсин!» — дейди у.
Ўзбекистонда биринчи марта марта ID-карта олиш учун тўланадиган давлат божи Миграция бўлими, Давлат хизматлари маркази ёки консуллик орқали ариза берилганида базавий ҳисоблаш миқдорининг 89 фоизи— 366 минг 680 сўм. my.gov орқали онлайн ариза берилганида эса БҲМнинг 80,1 фоизини (330 минг 12 сўм) тўлаш керак. Агар ID-картада хатолик бўлса, у бепул алмаштириб берилади.
2025-йил 1-августдан буён БҲМ 412 минг сўм. Аммо 2026-йил 1-сентябрдан бошлаб эса БҲМ миқдори 440 минг сўм бўлади.
