IQ бўйича энг ақлли давлатлар рейтинги эълон қилинди — Ўзбекистон IQ даражаси қандай?
137 мамлакат қамраб олинган янги рейтингда Осиё давлатлари аҳолисининг интеллект кўрсаткичлари етакчилик қилди.
International IQ Test томонидан эълон қилинган навбатдаги рейтингга кўра, дунё мамлакатлари аҳолисининг ўртача интеллект коэффициенти асосида баҳолаш натижалари янгиланди. 2026 йил бошига қадар тузилган ушбу рейтинг 137 мамлакат ва ҳудуддан 1,2 миллион нафар иштирокчининг тест натижаларига таянади. Барча иштирокчилар бир хил стандарт топшириқларни бажарган бўлиб, натижалар умумий таҳлил асосида шакллантирилган.
IQ даражаси энг юқори давлат
Рейтингда биринчи ўринни Жанубий Корея эгаллади. Ушбу мамлакат аҳолисининг ўртача IQ кўрсаткичи 106,97 баллни ташкил этган. Мутахассислар буни таълим тизимига юқори талаблар, фан ва технологияларга йўналтирилган сиёсат билан изоҳлади.
Иккинчи ва учинчи ўринлар Хитой ҳамда Японияга тўғри келган. Хитойда ўртача IQ даражаси 106,48 баллни, Японияда эса 106,3 баллни ташкил этган. Бу мамлакатларда ҳам таълим сифати, интизом ва илмий тадқиқотларга сармоя юқори экани қайд этилмоқда.
Рейтингнинг илк бешлигига, шунингдек, Эрон ва Австралия кирган. Эрон аҳолисининг ўртача IQ кўрсаткичи 104,8 балл, Австралияда эса 104,45 балл сифатида баҳоланган. Бу натижалар ушбу давлатларда инсон капиталига қаратилган дастурлар самарадорлигини кўрсатади.
Кучли ўнликка кирган давлатлар
Россия 103,78 балл билан олтинчи ўринни эгаллаган. Ундан кейин Сингапур 103,56 балл ва Мўғулистон 102,61 балл келади. Биринчи ўнликни Янги Зеландия 102,35 балл ва Ветнам 102,26 балл якунлайди.
АҚШ эса 101,04 балл билан 18-ўриндан жой олган. Рейтингнинг энг қуйи қисмида айрим Африка давлатлари қайд этилган бўлиб, рўйхатни Сомали якунлайди.
Ўзбекистоннинг IQ даражаси
Ўзбекистондан 4 671 иштирокчи қамраб олинган. Аҳолининг ўртача IQ кўрсаткичи 96,51 балл билан Марказий Осиё давлатлари орасида энг юқори кўрсаткични қайд этмоқда.
