Isroil va Suriya otishmaning to‘xtatilishi bo‘yicha kelishib oldi

2025 yil 18 iyul kuni Isroil va Suriya Svayda viloyatidagi ziddiyatni yumshatish maqsadida vaqtincha otishmani to‘xtatish haqida kelishib oldi. Bu haqda AQSHning Turkiyadagi elchisi Tom Barrak ma’lum qildi. Unga ko‘ra, kelishuv Turkiya, Iordaniya va boshqa qo‘shni davlatlar tomonidan qo‘llab-quvvatlangan. Isroil Suriya hukumat kuchlari tomonidan druz millatiga nisbatan qaratilgan zo‘ravonliklar ortidan Damashq hamda mamlakat janubidagi hukumat pozitsiyalariga havo zarbalari bergan edi. Shu bilan birga, Isroil Suriya kuchlariga ikki kunlik muddatda Svaydaga cheklangan kirish huquqini berdi. Damashq rasmiylari ham janubda tinchlikni tiklash va zo‘ravonlikni qayta boshlanishining oldini olish uchun siyosiy va xavfsizlik choralarini ko‘rishini ma’lum qildi. Ammo mahalliy aholi va jurnalistlar janjallar to‘liq to‘xtamaganini, shimol va g‘arbiy Svaydada to‘qnashuvlar davom etayotganini aytmoqda. Suriyaning vaqtincha hukumat kuchlari va mahalliy guruhlar o‘rtasidagi to‘qnashuvlar oqibatida 321 kishi halok bo‘lgan, yuzlab aholi yaralangan va ko‘plab oilalar ko‘chirishga majbur bo‘lgan. UNXK ma’lumotiga ko‘ra, o‘tkazilgan hujjatli tahlillarda hatto oilaviy yig‘ilishga qilingan hujum, olib ketib o‘ldirish kabi huquqbuzarliklar qayd etilgan. Svayda shahrida to‘rt kundan beri elektr, ozuqa va suv ta’minoti uzilgan. Internet va aloqa vositalari cheklangan. Shaharga minglab beduin jangchilari kirib kelayotgani hududda to‘liq tinchlik tiklanishiga shubha uyg‘otmoqda. Bu orada AQSH Isroilning Suriyaga bergan so‘nggi zarbalarini qo‘llab-quvvatlamaganini bildirgan. Shu bilan birga, Isroil hududdagi duzlarni himoya qilish uchun harakat qilganini rasman ma’lum qilgan.