Kim Chen In Rossiyaga katta va’da berdi

Shimoliy Koreya rahbari Kim Chen In Rossiya tashqi ishlar vaziri Sergey Lavrovga Pxenyan Rossiya hukumatining Ukrainadagi «vaziyatni hal etish»bo‘yicha harakatlarini qo‘llab-quvvatlashni davom ettirishga tayyor ekanligini bildirdi. Bu haqda Shimoliy Koreyaning KCNA davlat axborot agentligi xabar berdi. Agentlik ma’lumotiga ko‘ra, Kim Moskva va Pxenyan o‘rtasidagi kelishuvlarga binoan Ukrainadagi vaziyatni «tubdan hal qilishga qaratilgan Rossiya rahbariyatining barcha chora-tadbirlarini so‘zsiz qo‘llab-quvvatlashni davom ettirishga» tayyorligini izhor etgan. Lavrov uch kunlik tashrif bilan Shimoliy Koreyada bo‘ldi. Rossiya Tashqi ishlar vazirligi matbuot bayonotida Pxenyanning «Rossiyaning maxsus harbiy operatsiyasini izchil va prinsipial qo‘llab-quvvatlagani», shuningdek, Shimoliy Koreya askarlarining urushda ishtirok etgani uchun «samimiy minnatdorlik» bildirdi. Matbuot anjumanida Lavrovdan Shimoliy Koreya kuchlari Ukrainadagi urushning yangi jabhalariga joylashtirilishi mumkinligi haqida so‘raldi. U Kim Shimoliy Koreyaning Rossiyani qo‘llab-quvvatlash shaklini o‘zi hal qilishini aytdi. «Biz KXDR rahbari, davlat ishlari bo‘yicha raisning takliflariga javob beryapmiz. Bu samimiy birdamlik ifodasini rad etishga hech qanday sababimiz yo‘q edi», - dedi Lavrov. Shimoliy Koreya qo‘shinlari Rossiyaning Kursk viloyatidagi janglarda ishtirok etdi, viloyatning bir qismi 2024 yil avgust oyida Ukraina kuchlari tomonidan egallab olingan edi. Shimoliy Koreyaning jangovar harakatlarga aralashuvi haqidagi dastlabki ma’lumotlar oktyabr oyida tarqalgan bo‘lsa-da, Moskva buni 2025 yil aprel oyi oxirigacha rasman tan olmadi. Ukraina razvedkasining ma’lumotlariga ko‘ra, Shimoliy Koreya keyingi oylarda urushga 25-30 ming askar yuborishi kutilmoqda.