Ким Чен Иннинг синглиси ҳокимият тепасига қайтди

Корея Халқ Демократик Республикаси етакчиси Ким Чен Иннинг синглиси Ким Ё Жонг ҳукмрон Меҳнат партияси Марказий қўмитасининг бўлим мудири лавозимига тайинланди. Бу ҳақда 24 феврал куни Корея марказий телеграф агентлиги хабар тарқатди. Мазкур қарор Пхенянда ўтказилган партия пленумида қабул қилинган бўлиб, у Ким Ё Жонгнинг мавқеини вазир даражасига кўтарди ва унинг ҳокимият доирасидаги таъсирини расмийлаштирди.

Хабарда Ким Ё Жонг айнан қайси бўлимни бошқариши очиқланмаган. Бироқ халқаро таҳлилчилар у мамлакатдаги мафкура, ғоявий хабарлар ва етакчи шахсига сиғиниш масалаларини назорат қилувчи тарғибот ва ташвиқот бўлимини қўлга олишини тахмин қилмоқда. Ким Ё Жонг бундан аввал мазкур бўлимда мудир ўринбосари бўлиб ишлаган..

Шунингдек, у партиянинг олий қарор қабул қилувчи органи — Сиёсий бюро аъзолигига (номзод сифатида) қайтди. Ким Ё Жонг 2020 йилгача ушбу органда аъзо бўлган, бироқ 2021 йилги партия қурултойида унинг исми рўйхатдан тушиб қолган эди. Ўшанда экспертлар буни вақтинчалик лавозимини пасайтириш деб баҳолаган эдилар.

Сеулдаги Миллий бирлашиш институти катта тадқиқотчиси Хонг Миннинг айтишича, бу тайинлов унинг нафақат етакчининг синглиси, балки мустақил сиёсий куч эканини институционал даражада тасдиқлади. Ким Ё Жонг сўнгги йилларда Сеул ва Вашингтонга нисбатан қатъий баёнотлар бериш орқали Пхеняннинг ташқи сиёсатдаги асосий овозига айланган эди. Одатда у биринчи бўлиб кескин муносабат билдиради, сўнгра Ким Чен Ин расмий тадбирларда якуний позицияни расмийлаштиради.

Ким Ё Жонг Ким Чен Иннинг бошқарувини мувофиқлаштирувчи ишончли ёрдамчидир. У келажакда етакчининг қизи Ким Жу Аэ учун васий ва ҳокимият меросхўрлиги жараёнининг ҳимоячиси вазифасини бажариши мумкин.