Lamin Yamal 17 yoshida dunyodagi eng qimmat futbolchisiga aylandi

Yamalning transfer qiymati 180 mln yevrodan 200 mln yevrogacha oshirildi. Bu bilan u avvalgi yetakchi — «Real»ning braziliyalik yulduzi Vinisius Juniorni ortda qoldirdi. Vinisiusning qiymati esa 30 mln yevroga kamayib, 170 mln yevroga tushdi. Transfermarkt reytingining ikkinchi o‘rnida uch nafar futbolchi joy olgan: «Real» forvardi Kilian Mbappe, uning jamoadoshi Jud Bellinghem va «Manchester Siti» hujumchisi Erling Holand — har biri 180 mln yevroga baholangan. Yamal may oyida «Barselona» bilan 2031 yilgacha shartnoma uzaytirgan edi. 3 iyun kuni u Xalqaro sport tadqiqotlari markazi (CIES Football Observatory) tomonidan ham dunyodagi eng qimmat futbolchi, deb tan olindi. Uning iqtisodiy algoritm asosida baholangan transfer qiymati 402,3 mln yevroga yetdi. Yamal Yevro-2024ning eng yaxshi yosh futbolchisi va chempion unvonini qo‘lga kiritgan. Shuningdek, u Yevropadagi eng yaxshi yosh futbolchiga beriladigan Golden Boy mukofotini ham yutgan. Joriy mavsumda esa u «Barselona» bilan birga Ispaniya chempionligi va Kubogini qo‘lga kiritgan.