Makron obrazi ko‘zoynak ishlab chiqaruvchi kompaniya aksiyalarini «portlatdi»
Fransiya prezidentining Davosdagi chiqishi kutilmagan tarzda bir optika kompaniyasi aksiyalariga kuchli ta’sir qildi va bozorda keskin reaksiyani keltirib chiqardi.
Fransiya prezidenti Emmanuel Makronning Davosda bo‘lib o‘tgan Jahon iqtisodiy forumida quyoshdan himoyalovchi ko‘zoynakda paydo bo‘lishi fond bozorida kutilmagan «vau-effekt»ni keltirib chiqardi.
Ushbu chiqishdan so‘ng ko‘zoynakni ishlab chiqaruvchi Italiyaning «iVision Tech» kompaniyasi aksiyalari bir kun ichida qariyb 28 foizga o‘sdi, deb xabar bermoqda Reuters. Makron taqqan aksessuar ijtimoiy tarmoqlarda tezda virusli obrazga aylanib, investorlar diqqatini kompaniyaga qaratdi.
«iVision Tech» kompaniyasining rasman tasdiqlashicha, Fransiya prezidenti kompaniyaga qarashli, fransuz premium brendi «Henry Jullien» ishlab chiqargan «Pacific S 01» modeli bo‘lgan. Kompaniya rahbariyatiga ko‘ra, aynan ushbu vizual effekt bozordagi shiddatli talabni shakllantirgan.
Fransiya rahbarining ko‘zoynakda chiqishi ortidan investorlar orasidagi qiziqish keskin ortgani aksiyalar narxida darhol aks etdi.
Bozordagi keskin reaksiya
«iVision Tech» bosh direktori Stefano Fulchir bu holatni «aksiyalar uchun to‘liq vau-effekt» deya baholadi. Uning aytishicha, ushbu ko‘zoynak Makronga 2024 yilda shaxsan yuborilgan bo‘lib, brend mahsuloti darhol tanib olingan. Kompaniya saytida mazkur model narxi 659 yevro etib belgilangan.
Aksiyalar qimmatlashuvi natijasida «iVision Tech»ning bozor qiymati taxminan 3,5 mln yevroga oshgan. Milan birjasida savdolar hatto qisqa muddatga to‘xtatilgan, sababi narx o‘zgarishi me’yordan oshib ketgan. Avvalgi savdo kunida aksiyalar qariyb 6 foizga o‘sgan bo‘lsa, keyingi kun rekord darajada sakrash kuzatilgan.
Mutaxassislar bu holatni brend uchun bepul reklama sifatida baholamoqda.
Virusli obraz ta’siri
Makronning yopiq binoda ko‘zoynak taqib chiqishi ijtimoiy tarmoqlarda memlar to‘lqinini keltirib chiqardi. Ko‘plab foydalanuvchilar uni Tom Kruz ishtirok etgan «Top Gun» filmi qahramoni bilan qiyosladi. Bu esa obrazning ommalashuvini yanada tezlashtirdi.
Fransiya prezidenti ma’muriyati ko‘zoynak tibbiy sabablarga ko‘ra taqilganini bildirib, brendni rasman tasdiqlamadi. Ammo ishlab chiqaruvchi bayonoti bozor uchun yetarli bo‘ldi. Hodisa siyosiy obraz, ijtimoiy tarmoqlar va biznes manfaatlari qanday kesishishi mumkinligini yana bir bor namoyon qildi.
