Мария Захарова ўзбекистонлик блогер Макаренкони «сохта ватанпарвар» деб атади

Россия Ташқи ишлар вазирлигининг расмий сўзловчиси Мария Захарова ўзбекистонлик блогер Никита Макаренкони «сохта ватанпарвар» деб атади. Бу ҳақда Россия ТИВ сайтида пост жойланди.

Унинг айтишича, Макаренконинг мақсади — ташқи кучлар кўрсатмаси билан Россия ва Ўзбекистон ўртасидаги стратегик ҳамкорликка соя солиш.

Гап 11-август куни туҳмат, ҳақорат ҳамда миллий, ирқий, этник ёки диний адоват қўзғатишда айбдор деб топилиб, 4 йил 2 ойга қамоқ жазосига ҳукм қилинган бошқа ўзбекистонлик Азиз Ҳакимов ҳақида кетмоқда. Захарованинг айтишича, Ҳакимов «Россия-Ўзбекистон муносабатларини мустаҳкамлаш ва умумий тарихий хотирани сақлаш» тарафдори бўлган.

Россия дипломатик идораси вакилининг сўзларига кўра, Ҳакимов устидан судга мурожаат қилишнинг асосий ташаббускори Макаренко бўлган.

Макаренко Ҳакимов «Ўзбекистон Республикасининг суверенитетига қарши чиққан, СССРни тарғиб қилган ва уни қайта тиклаш зарурлигини айтган, шунингдек, 1930-йиллардаги сиёсий қатағонлар қурбонлари ҳамда 1920-йиллардаги миллий-озодлик кураши хотирасини ёмонотлиқ қилган», деб баёнот берган. Макаренко, шунингдек, ушбу иш бўйича жабрланувчи сифатида қатнашганини билдирган.

«Бир неча йил давомида Азиз Ҳакимов менинг номимга нисбатан ёлғон, туҳмат ва ҳақоратли маълумотларни тарқатиб келган», — деган Макаренко.

Захарова эса Макаренконинг чиқишларини «русофобик фейклар» деб атади. Унинг таъкидлашича, Макаренко тарихий фактларни атайлаб бузиб кўрсатмоқда ва одамлар ўртасида адоват тарқатмоқда.

«Дўстона давлатимиз — Ўзбекистон ҳукумати ниҳоят бу сохта ватанпарварнинг фаолиятига обектив ҳуқуқий баҳо беради, деб умид қиламиз», — дея хулоса қилган Россия ТИВ вакили.