«Men — ketib borayotgan insonman»: Lukashenko hokimiyatni «ko‘karib ketgan barmoqlar» bilan ushlab turmayotganini aytdi
U 1994 yilda ilk bor Belarus prezidenti etib saylangan, shundan beri bir necha bor qayta saylangan va mamlakatni allaqachon yettinchi prezidentlik muddati davomida boshqarib kelmoqda.
Belarus prezidenti Aleksandr Lukashenko yana bir bor hokimiyatni «ko‘karib ketgan barmoqlar» bilan ushlab turmayotganini bildirdi.
«Amaldagi prezident, men tez-tez aytganimdek, hokimiyatni ko‘karib ketgan barmoqlar bilan ushlab turmayapti», — dedi Lukashenko mamlakat Bosh prokuraturasi va Tergov qo‘mitasiga yangi rahbarlarni tayinlash chog‘ida. Belarus yetakchisining so‘zlaridan BelTA agentligi iqtibos keltirdi.
Lukashenko mavjud davlat tuzumiga qarshi «inqilobiy» kurash tomon qadamlar bo‘lmasligi kerakligini ta’kidladi, hokimiyatni almashtirish uchun saylovlar mavjudligini bildirdi.
«Mavjud davlat tuzumiga qarshi «inqilobiy» kurash rejalari yo‘q. Buning uchun saylovlar bor. Saylovlarga borish va bu muammolarni hal qilish kerak. Belarusda bu borada barcha imkoniyatlar bor», - dedi Lukashenko.
«Men — ketib borayotgan insonman. Garchi ko‘plar bunga yopishib olgan bo‘lsa-da: Hmm, ketib borayotgan!.. Kimdir xavotirda, kimdir xursand. Bu esa ertaga hammamiz bu ishlarni tashlab, men ham jumladan, ketib qolamiz degani emas. Ammo tushunarliki, men endi prezident sifatida birinchi yoki ikkinchi yil ishlayotgan odam emasman», - dedi davlat rahbari. «Bu shuni anglatadiki, men xalqimizning huquq va manfaatlarini muqaddas tarzda himoya qilaman. Sizlar ham shu yo‘nalishda ishlashingiz kerak», - deya qo‘shimcha qildi Lukashenko.
Lukashenko 1994 yilda ilk bor Belarus prezidenti etib saylangan, shundan beri bir necha bor qayta saylangan va mamlakatni allaqachon yettinchi prezidentlik muddati davomida boshqarib kelmoqda. U 2019 yil oxirida prezidentlik kreslosini «ko‘karib ketgan barmoqlar» bilan ushlab turmayotganini aytgan va keyinchalik bu fikrni bir necha bor takrorlagan. Shuningdek, u o‘zini «ketib borayotgan» prezident deb atagan. Jumladan, 18-dekabr kuni Butun Belarus xalq yig‘ini majlisida Lukashenko o‘zini ketib borayotgan prezident deb atab, mavjud muammolarni hal etishni niyat qilganini va ularni yangi avlod zimmasiga yuklashni istamasligini aytgan.
Bu yil avgust oyida Amerikaning Time nashriga bergan intervyusida Lukashenko hozircha navbatdagi prezidentlik muddatiga nomzodini qo‘yishni rejalashtirmayotganini bildirgan. Shu bilan birga, yangi prezidentlik muddati ehtimoli va sog‘lig‘i haqida gapirar ekan, AQSH prezidenti Donald Trampdan ham baquvvat bo‘lishga harakat qilishini aytgan. Yaqinda o‘tgan VXJ majlisida kelgusi prezidentlik saylovlari haqidagi savolga javob berib, Belarus rahbari bo‘lajak saylovlar vaqtigacha sog‘lom bo‘lishini kafolatlashini, ammo ularda ishtirok etishini kafolatlamasligini bildirgan. Belarus prezidenti saylovlari 2030 yil 20-yanvaridan kechiktirmasdan o‘tkazilishi kerak.
