Moldovada rossiyaparast partiyalarning saylovlarda ishtiroki butkul taqiqlandi

Moldova Oliy sud palatasi rossiyaparast siyosiy kuchlarning saylovda ishtirok etishga oid barcha da’volarini rad etdi. Ushbu qarorlar mamlakatdagi siyosiy maydonda Ilan Shorga aloqador partiyalarning butunlay chetlatilishiga olib keldi. Newsmaker xabariga ko‘ra, Oliy sud palatasi 29–30 avgust kunlari «Uyg‘onish», «Moldova Mare» va «Moldova markazchilar ittifoqi» partiyalari tomonidan berilgan arizalarni ko‘rib chiqib, saylovga qo‘ymaslik haqidagi qarorni qo‘llab-quvvatladi. Moldova Markaziy saylov komissiyasi avvalroq «Uyg‘onish» partiyasining nomzodlar ro‘yxatini rad etgan, chunki u Shorga aloqador to‘rtta partiya faoliyatini cheklash to‘g‘risidagi apellyatsion qaror asosida harakat qilgan. «Moldova Mare» partiyasi esa nomzodlar ro‘yxatidagi bitta shaxsning sudlanganligi sabab chiqarilishi natijasida gender miqdoriy nisbatni buzgan — 10 o‘rindan 7 tasini erkaklar egallagan. Bu amalda qonun bilan belgilangan 60/40 nisbatini buzganini anglatadi. «Moldova markazchilar ittifoqi» partiyasiga kelsak, uning ro‘yxatidan ikki nomzod so‘nggi muddatdan keyin partiyani almashtirgani aniqlangan. Bu holat ularning yuridik mezonlarga javob bermasligini ko‘rsatgan. Moldova Oliy sud palatasining bu qarorlari yakuniy hisoblanadi va qayta ko‘rib chiqilmaydi. Bu bilan Ilan Shor va uning tarafdorlari siyosiy maydondan butunlay chetlatildi.