Moskva va Qashqadaryoda terrorchi guruh a’zolari qo‘lga olindi

Rossiya Federatsiyasi Federal xavfsizlik xizmati (FSB) va O‘zbekiston Davlat xavfsizlik xizmati (DXX) hamkorligida Moskvada xalqaro terroristik tashkilotning yashirin guruhi aniqlanib, faoliyati to‘xtatildi. Tarkibida 9 nafar xorij fuqarosi bo‘lgan guruh Yevropa Ittifoqida joylashgan ideologlar ko‘rsatmalari asosida mehnat muhojirlarini yollash bilan shug‘ullangan. Ma’lumotlarga ko‘ra, radikallar yashirin yig‘ilishlar o‘tkazib, Telegram orqali videokonferensiyalar tashkil etgan. Bu uchrashuvlarda «umumjahon xalifati» g‘oyasi asosida mafkuraviy tayyorgarlik olib borilgan va yollangan shaxslarni terrorchilik faoliyatiga jalb qilish rejalashtirilgan. FSB ma’lumotiga ko‘ra, Rossiya hududida 7 nafar guruh a’zosi qo‘lga olingan. Ular mehnat muhojirlarining ishonchiga kirib, ekstremistik harakatlarga moyil qilish uchun maxsus dastur asosida ish yuritgan. Shu bilan birga, DXX Qashqadaryo viloyatida o‘tkazgan tadbirlar davomida yana 2 nafar a’zo hibsga olindi. Qo‘lga olinganlar yashash joylarini ko‘zdan kechirish jarayonida 4 ta mobil telefon, 3 dona ekstremistik adabiyot, 2 ta flesh-xotira va 1 ta xorijiy sim-karta daliliy ashyo sifatida musodara qilindi. Tergov jarayonida aybdorlarning aloqalari va mablag‘ manbalari aniqlanmoqda.