Muhojirlik «romantikasi» tugadi: «Qochmoqchi bo‘lsang, timsohdan qanday qochishni o‘rgan»
Tramp Floridadagi botqoqlar va alligatorlar bilan o‘ralgan migrantlarni saqlash markazining ochilish marosimida ishtirok etadi. U bu markazning izolyatsiyada joylashgani va tabiiy xavflar bilan to‘la muhiti orqali muhojirlarga qattiq ogohlantirish yuborishni maqsad qilmoqda.
Donald Tramp Florida shtatidagi Evergleyds botqog‘ida joylashgan yangi migratsiya markazini o‘zining qonuniy qat’iyat ramzi sifatida namoyon qilmoqchi. Uning aytishicha, bu joy muhojirlarga qonuniy tartibni buzish oqibatlari jiddiy ekanini ko‘rsatish uchun maxsus tanlangan.
Markaz tabiiy ofatlardan so‘ng vaqtincha turar joy sifatida qo‘llaniladigan vagonlardan tashkil topgan. Mahalliy OAVda u «Alligator Alcatraz» (Timsohli Alkatras) deb nomlanmoqda. Bu laqab huquq faollarini tashvishga solgan bo‘lsa-da, Trampning qat’iy migratsiya siyosati tarafdorlari tomonidan qo‘llab-quvvatlanmoqda.
«Bu yaxshi ish emas», dedi Tramp Oq uyni tark etishidan oldin. U hazil bilan qo‘shimcha qildi: «Qamoqdan qochsang, timsohdan qanday qochishni o‘rganishingga to‘g‘ri keladi. To‘g‘ri yugurma, shunday yugur», deya qo‘lini zigzag tarzida silkitdi. «Shunda omading 1% oshadi».
Muhojirlar markazi Mayamidan taxminan 80 km uzoqlikda joylashgan bo‘lib, 5 000 nafar kishini qabul qilish imkoniyatiga ega. Uning qurilishi atrof-muhitga va muqaddas yerlarga zarar yetkazishi mumkinligi tanqidlarga sabab bo‘lgan.
Shu bilan birga, Tramp ma’muriyati uchun markazning botqoq, hasharotlar, pitonlar va timsohlarga to‘la hududda joylashgani eng asosiy afzallik hisoblanmoqda. Oq uy bu orqali «Migratsiya qonunlarini buzish oqibatlari og‘ir bo‘ladi» degan qat’iy signalni yubormoqchi.
