Neft narxi yetti oylik eng yuqori darajaga yaqinlashdi

Bugun, 24-fevral kuni neft narxlari o‘sib, so‘nggi yetti oydagi eng yuqori ko‘rsatkichlarga yaqinlashdi. Treyderlar AQSH va Eron o‘rtasida navbatdagi yadroviy muzokaralar arafasidagi geosiyosiy xatarlarni baholar ekan, AQSH savdo siyosatidagi noaniqlik ham umumiy xavotirlarni kuchaytirdi. Bu haqda «Reuters» xabar berdi.

«Brent» markali neft fyucherslari 59 sentga yoki 0,8 foizga oshib, barreli 72,08 dollarga yetdi. AQSHning WTI nefti esa 57 sentga yoki 0,9 foizga ko‘tarilib, 66,88 dollarga yetdi.

«Brent» 31-iyuldan buyon eng yuqori darajada savdolanmoqda, WTI esa 1-avgustdan beri eng mustahkam ko‘rsatkichni qayd etmoqda.

Tahlilchilar nima deydi?

«Hozirgi bosqichda neft narxlarini asosan geosiyosat qo‘llab-quvvatlamoqda. Hozirgi mustahkamlik amaldagi ta’minot yo‘qotishidan ko‘ra, kutilmalar bilan bog‘liq», – deydi «Phillip Nova» kompaniyasining katta bozor tahlilchisi Priyanka Sachdeva.

Uning ta’kidlashicha, Yaqin Sharqda ehtimoliy harbiy keskinlik xavfi ortib bormoqda va treyderlar eng yomon ssenariylarga qarshi o‘z pozitsiyalarini himoya qilmoqda.

AQSH-Eron muzokaralari

Omon tashqi ishlar vaziri Badr Albusaidining ma’lum qilishicha, Eron va AQSH 26-fevral kuni Jenevada yadroviy muzokaralarning uchinchi raundini o‘tkazadi. AQSH Erondan yadroviy dasturidan voz kechishni talab qilmoqda. Eron esa bunga qat’iy ravishda qarshi chiqib, atom quroli yaratishga urinayotganini rad etmoqda.

23-fevral kuni Davlat departamenti yuqori martabali manbaga tayanib bildirishicha, Eron bilan ehtimoliy harbiy mojaro xavfi ortib borayotgani sababli AQSH Bayrutdagi elchixonasidan zarur bo‘lmagan xodimlar va ularning oilalarini chiqarmoqda.

AQSH prezidenti Donald Tramp 23-fevral kuni ijtimoiy tarmoqdagi bayonotida, agar kelishuvga erishilmasa, Eron uchun «juda yomon kun» bo‘lishini aytdi.

«So‘nggi olti oyni belgilab bergan 55–66,50 dollarlik savdo diapazonining yuqori chegarasida neft qolmoqda. Agar ushbu chegara barqaror ravishda buzilsa, narxlar 70–72 dollargacha o‘sishi mumkin. Aks holda, keskinlik pasaysa, narxlar 61 dollar atrofiga qaytishi mumkin», – deydi IG kompaniyasi bozor tahlilchisi Toni Sikamor mijozlarga yo‘llagan izohida.

Savdo siyosati

Savdo siyosati borasida esa Tramp Oliy sud uning favqulodda tariflarini bekor qilganidan so‘ng, yaqinda imzolangan savdo kelishuvlaridan chekinishga uringan mamlakatlarni boshqa qonunlar asosida ancha yuqori bojlar bilan jazolashi mumkinligidan ogohlantirdi.

UOB Bank tahlilchilarining qayd etishicha, Trampning yangi tarif oshirishlari global iqtisodiy o‘sish va yoqilg‘iga bo‘lgan talab istiqboliga nisbatan noaniqlik yaratmoqda.

Tramp 21-fevral kuni AQSHning barcha davlatlardan import qilinadigan mahsulotlariga nisbatan vaqtinchalik 10 foizlik tarifni 15 foizgacha oshirishini bildirgan edi. Bu qonun doirasida ruxsat etilgan eng yuqori daraja hisoblanadi.