Netanyahu: Falastin davlati ham, nazoratsiz G‘azo ham bo‘lmaydi

Binyamin Netanyahu AQSH prezidenti Donald Tramp bilan birgalikda taqdim etilgan G‘azo bo‘yicha reja orqali HAMASni «burchakka qamash»ga erishganini aytdi. Uning ta’kidlashicha, xalqaro hamjamiyat, shu jumladan arab va islom olami, HAMASni mazkur shartlarni qabul qilishga majbur etmoqda. Rejaga ko‘ra, Isroil G‘azodagi asirlarini ozod qilishga erishishi, biroq hududning katta qismida nazoratni saqlab qolishi ko‘zda tutilgan. Netanyahu «Falastin davlatini barpo etish mutlaqo istisno qilingan», deb qo‘shimcha qildi. Shu bilan birga, Isroil moliya vaziri Betsalel Smotrich bu pozitsiyani «diplomatik fojia» deb atadi. Uningcha, Tramp rejasi kelajakda Isroilni yana G‘azoda urushga tortadi va kelishuvlarni qayta ko‘rib chiqishdan voz kechish mamlakatni zaiflashtiradi. Smotrich va uning tarafdorlari G‘azoni to‘liq bosib olish, falastinliklarni majburan u yerdan siqib chiqarish va sektorda yangi noqonuniy yahudiy manzilgohlari qurilishini talab qilmoqda.