OpenAI интернет браузерлар инқилобини бошлаганини эълон қилди
Компания ChatGPT асосида ишлайдиган янги «Atlas» браузерини тақдим этди. У Google Chrome’га рақобатчи сифатида ишлаб чиқилган.
OpenAI компанияси «Atlas» номли янги веб-браузерни ишга туширди. У ChatGPT сунъий интеллект дастурига асосланган бўлиб, фойдаланувчиларга интернетдан қулайроқ тарзда фойдаланиш имконини беради.
Компания асосчиси Сэм Алтманнинг сўзларига кўра, браузерлар соҳасида сўнгги йилларда катта янгилик бўлмаган. «Atlas» эса интернетдан фойдаланишни сунъий интеллект орқали янги босқичга олиб чиқиши кутилмоқда.
Дастлаб «Atlas» фақат Mac компютерларида ишлайди. Браузер орқали фойдаланувчи саҳифани тарк этмасдан туриб турли вазифаларни бажара олади. Шунингдек, «agent mode» функцияси интернетни автоматик тарзда айланиб чиқиб, фойдаланувчи қизиқишларига мос маълумотларни топиб беради.
Бироқ айрим мутахассисларнинг фикрича, тизим фойдаланувчи маълумотларига ҳаддан зиёд суянади ва бу шахсий эркинликка хавф солиши мумкин.
Ҳозирги кунда Google Chrome дунёда энг кўп ишлатиладиган браузер бўлиб, 3 миллиардга яқин фойдаланувчига эга. Шу билан бирга, ChatGPT каби сунъий интеллект воситалари интернетда маълумот топиш усулини ўзгартириб, Chrome’га жиддий рақобатчи бўла бошлади.
BBC ва ЕИ телерадио уюшмаси (EBU) ўтказган сўнгги тадқиқотда эса AI жавобларининг ярмидан кўпида хатоликка йўл қўйгани аниқланган. Бу эса сунъий интеллектга ишонч масаласини савол остига қўймоқда.